پاکستان نے کسی بھی آئی سی سی فل ممبر کا زیادہ انٹرنیشل ٹی ٹونٹی فائنلز جیتنے کا بھارتی ریکارڈ برابر کردیا

تین ملکی ٹی ٹونٹی سیریز کے فائنل میں محمد نواز کی تباہ کن بولنگ کی بدولت پاکستان نے افغانستان کو 75 رنز سے شکست دے دی

ذیشان مہتاب پیر 8 ستمبر 2025 14:16

پاکستان نے کسی بھی آئی سی سی فل ممبر کا زیادہ انٹرنیشل ٹی ٹونٹی فائنلز ..

لاہور (اردو پوائنٹ تازہ ترین اخبار ۔ 8 ستمبر 2025ء ) تین ملکی سیریز کے فائنل میں افغانستان کو شکست دیکر قومی ٹیم نے کسی بھی فل ممبر کا سب سے زیادہ انٹرنیشل ٹی ٹونٹی فائنلز جیتنے کا بھارتی ریکارڈ برابر کردیا۔

تفصیلات کے مطابق تین ملکی ٹی ٹونٹی سیریز کے فائنل میں محمد نواز کی تباہ کن بولنگ کی بدولت پاکستان نے افغانستان کو 75 رنز سے شکست دے دی۔

شارجہ میں کھیلے گئے تین ملکی ٹی ٹونٹی سیریز کے فائنل میں پاکستان نے افغانستان کے خلاف ٹاس جیت کر بیٹنگ کا فیصلہ کیا۔

پاکستان نے پہلے کھیلتے ہوئے مقررہ 20 اوورز میں 8 وکٹ پر 141 رنز سکور کیے۔

پاکستان کی جانب سے فخر زمان نے 27، محمد نواز نے 25 اور سلمان آغا نے 24 رنز بنائے۔

(جاری ہے)

افغانستان کے راشد خان نے 3، نور احمد اور فضل الحق فاروقی نے 2، 2 وکٹیں حاصل کیں۔

142 رنز کے ہدف کے جواب میں افغان ٹیم محمد نواز کی تباہ کن بولنگ کی بدولت 15.5 اوورز میں 66 رنز پر ڈھیر ہوگئی۔

محمد نواز نے فائنل میچ میں افغانستان کے خلاف نہ صرف ہیٹ ٹرک مکمل کی بلکہ شاندار بولنگ کا مظاہرہ کرتے ہوئے 4 اوور میں 19 رنز دے کر 5 کھلاڑیوں کو آؤٹ کیا۔

محمد نواز نے دو اوور میں ہیٹ ٹرک مکمل کی، انہوں نے چھٹے اوور کی پانچویں گیند اور چھٹی گیند پر وکٹ حاصل کی اور پھر آٹھویں اوور کی پہلی گیند پر وکٹ حاصل کرکے ہیٹ ٹرک مکمل کی۔

محمد نواز کے علاوہ سفیان مقیم اور محمد ابرار نے 2،2 اور شاہین آفریدی نے ایک وکٹ حاصل کی۔ افٖغانستان کی جانب سے کپتان راشد خان 17 رنز کےساتھ ٹاپ اسکورر رہے۔

یہ پاکستانی ٹیم کی کسی بھی ٹی ٹونٹی انٹرنیشنل ٹورنامنٹ کے فائنل میں چوتھی کامیابی ہے، بھارت نے بھی اتنے ہی ٹی ٹونٹی انٹرنیشنل فائنلز جیت رکھے ہیں، سری لنکا کی ٹیم 3 ٹی ٹونٹی انٹرنیشنل فائنلز جیت کر اس فہرست میں دوسرے نمبر پر ہے۔