ٹی ٹونٹی فائنل میں بہترین بائولنگ فگرز، محمد نواز نے فواد عالم کا 19 سالہ ملکی ریکارڈ توڑ دیا

31 سالہ سپنر نے اپنے 4 اوورز کے سپیل میں صرف 19 رنز کے عوض 5 افغان کھلاڑیوں کو پوویلین کی راہ دکھائی

ذیشان مہتاب پیر 8 ستمبر 2025 14:51

ٹی ٹونٹی فائنل میں بہترین بائولنگ فگرز، محمد نواز نے فواد عالم کا 19 ..

لاہور (اردو پوائنٹ تازہ ترین اخبار ۔ 8 ستمبر 2025ء ) قومی ٹیم کے آل رائونڈر محمد نواز نے سہ ملکی سیریز کے فائنل میں افغانستان کیخلاف شاندار باولنگ کا مظاہرہ کرتے ہوئے 5 وکٹیں حاصل کرنے کے ساتھ ساتھ منفرد ریکارڈ بھی اپنے نام کرلیا۔

31 سالہ محمد نواز نے اپنے 4 اوورز کے سپیل میں صرف 19 رنز کے عوض 5 افغان کھلاڑیوں کو پوویلین کی راہ دکھائی اور ٹی ٹونٹی کرکٹ میں نئی تاریخ رقم کردی۔

محمد نواز اب کسی بھی ٹی 20 فائنل میں پاکستانی باولر کی جانب سے دوسرے بہترین باولنگ فگرز کے مالک بن گئے ہیں۔

کسی بھی ٹی ٹونٹی ٹورنامنٹ کے فائنل میں بہترین باولنگ کا پاکستانی ریکارڈ عثمان خان شنواری کے پاس ہے جنہوں نے 2013ء میں فیصل بینک ٹی ٹونٹی کپ کے فائنل میں زرعی ترقیاتی بینک کی جانب سے سوئی نادرن گیس پائپ لائن کی ٹیم کے خلاف محض 9 رنز دیکر 5 شکار کیے تھے۔

(جاری ہے)

محمد نواز اب اس فہرست میں دوسرے نمبر پر ہیں، سہیل خان 2011ء کے فیصل بینک ٹی ٹونٹی کپ کے فائنل میں کراچی ڈولفنز کی جانب سے فیصل آباد ریمز کیخلاف 23 رنز کے عوض 5 وکٹیں حاصل کرکے تیسرے، عماد وسیم پی ایس ایل 9 کے فائنل میں ملتان سلطانز کی ٹیم کیخلاف 23 رنز کے عوض 5 شکار کرکے چوتھے جب کہ فواد عالم 2006ء میں اے بی این ایمرو ٹونٹی ٹونٹی کپ کے فائنل میں کراچی ڈولفنز کی جانب سے سیالکوٹ سٹالینز کیخلاف 27 رنز کے عوض 5 کھلاڑی پوویلین بھیج کر اس فہرست میں پانچویں نمبر پر ہیں۔

محمد نواز اب T20I فائنل میں 5 وکٹیں لینے والے پہلے اسپنر بن گئے ہیں۔

وہ مجموعی طور پر صرف دوسرے بولر ہیں جنہوں نے T20I ٹورنامنٹ کے فائنل میں پانچ وکٹیں حاصل کیں۔

ان سے قبل پاپوا نیوگنی کے N. Vanua نے وانواتو کے خلاف 13 جولائی 2019ء کو 17 رنز کے عوض 5 کھلاڑی آئوٹ کیے تھے۔