کراچی : ڈرم سے ملنے والی خاتون کی لاش کا پوسٹ مارٹم مکمل ، اہم انکشاف سامنے آگیاتاہم خاتون کی شناخت نہیں ہوسکی

منگل 15 جولائی 2025 16:10

کراچی(اُردو پوائنٹ اخبارتازہ ترین - این این آئی۔ 15 جولائی2025ء)ملیر ندی کے قریب ڈرم سے خاتون کی لاش ملنے کے واقعے کا مقدمہ تھانہ شرافی گوٹھ میں درج کر لیا گیا۔مقدمہ سرکار کی مدعیت میں قتل کی دفعات کے تحت درج کیا گیا، دو روز گزر جانے کے باوجود خاتون کی شناخت نہ ہو سکی۔تفصیلات کے مطابق کراچی کے علاقے شرافی گوٹھ ملیر ندی کے قریب ڈرم سے خاتون کی لاش ملنے کے واقعے کی تحقیقات جاری ہے۔

ایس ایس پی ملیر ڈاکٹر عبدالخالق پیرزادہ نے بتایا لاش کا پوسٹ مارٹم مکمل کرلیا ہے، ابتدائی طور پر لاش 10سی12 روز پرانی لگتی ہے۔ایس ایس پی ملیر نے کہاکہ فنگرپرنٹس سے شناخت کرنے کی کوشش کی گئی لیکن لاش زیادہ پرانی ہونے کی وجہ سے فنگرپرنٹس نہیں مل سکے۔انھوں نے بتایا کہ مقدمہ تھانہ شرافی گوٹھ میں سرکار کی مدعیت میں درج کیا گیا ہے اور مختلف پہلوئوں سے تفتیش کررہے ہیں۔

(جاری ہے)

تھانوں کو خاتون کی گمشدگی کی رپورٹ پر فوری اطلاع کی ہدایت دی ہے ، ایک فیملی سے بھی رابطہ کیا مگر خاتون کی شناخت نہیں ہوئی۔یاد رہے ملیرندی سے خاتون کی 2 روز قبل ڈرم سے لاش ملی تھی، جس کے بعد مقدمہ سرکار مدعیت میں نامعلوم افراد کے خلاف درج کیا گیا تھا۔جس میں کہا گیا کہ لیڈی ایم ایل او کی جانب سے تین اعضا کے سیمپل لے لیے گئے ہیں، خاتون کو نامعلوم افراد نے کسی رنجش کی بنا پر قتل کیا اور قتل کے بعد نیلے رنگ کے پلاسٹک کے ڈرم میں بند کیا گیا۔متن میں مزیدکہاگیا کہ ملزمان لاش کو ملیر ندی بند جاجی شمبے گوٹھ پر پھینک کرفرار ہوئے، خاتون کو ایک سے زائد افراد نے مل کر قتل کیا۔