بھارتی بیٹر کے آئوٹ ہونے پر سنیل گواسکر کی ڈی آر ایس ٹیکنالوجی پر شدید تنقید

منگل 15 جولائی 2025 16:39

لارڈز(اُردو پوائنٹ اخبارتازہ ترین - این این آئی۔ 15 جولائی2025ء)بھارت کے سابق کپتان سنیل گواسکر نے ڈی آر ایس ٹیکنالوجی پر سوالات اٹھا دیے۔لارڈز میں بھارت اور انگلینڈ کے درمیان ہونے والے تیسرے ٹیسٹ کے آخری دن کا آغاز مہمان ٹیم کے لیے بدترین انداز میں ہوا۔بھارت نے 193 کے تعاقب میں اپنی دوسری اننگز کا آغاز 58 رنز 4 کھلاڑی آؤٹ پر کیا۔ میچ کے آخری روز اننگز کے دوبارہ آغاز پر جلد ہی رشبھ پنت، کے ایل راہول اور واشنگٹن سندر آئوٹ ہوگئے اور بھارت صرف 82 رنز پر 7 وکٹوں کا نقصان ہونے پر مشکل میں پھنس گیا۔

رشبھ پنت کو جوفرا آرچر نے شاندار گیند پر آؤٹ کیا اور واشنگٹن سندر بھی اسی انگلش بولر کے ہاتھوں آؤٹ ہوئے لیکن کے ایل راہول کے ایل بی ڈبلیو ہونے پر ایک بڑی بحث چھڑ گئی۔

(جاری ہے)

ابتداء میں کے ایل راہول کو ناٹ آئوٹ قرار دیا گیا لیکن بین اسٹوکس نے ایل بی ڈبلیو کے اپیل کی تو ڈی آر ایس ریویو کے بعد کے ایل راہول کو 39 رنز پر آئوٹ قرار دے دیا گیا تاہم سابق کرکٹر سنیل گواسکر نے کرکٹ میچ کے دوران فیصلہ سازی کا جائزہ لینے کے نظام (ڈی آر ایس) پر سوالات اٹھا دیے۔

انہوں نے کہا کہ حیرت انگیز طور پر یہ گیند اتنی نہیں اچھلی۔ جب بھارتی بولرز گیند کر رہے تھے تو زیادہ تر گیندیں ریویو میں اسٹمپس کے اوپر سے جا رہی تھیں، میں اس ٹیکنالوجی کے بارے میں سوال کر رہا ہوں۔واضح رہے کہ سابق بھارتی کرکٹر نے ڈی آر ایس ٹیکنالوجی پر پہلی بار تنقید نہیں کی بلکہ اس سے قبل میچ کے چوتھے روز ریویو کے بعد جو روٹ کو ناٹ آئوٹ قرار دینے پر بھی اٴْنہوں نے اس ٹیکنالوجی کو تنقید کا نشانہ بنایا تھا۔واضح رہے لارڈز ٹیسٹ کے پانچویں روز سنسنی خیز مقابلے کے بعد انگلینڈ نے بھارت کو 22 رنز سے شکست دے کر سیریز میں1-2 کی برتری حاصل کرلی ہے۔