Live Updates

عمران خان کی 6 اور بشری بی بی کی ایک مقدمے میں عبوری ضمانتوں میں توسیع

سماعت کے دوران عمران خان کی ضمانت کی درخواستوں پر آج بھی دلائل نہیں ہوسکے ‘ بشری بی بی کی ضمانت کی درخواست پر محفوظ فیصلہ بھی نہیں سنایا جا سکا

میاں محمد ندیم منگل 15 جولائی 2025 15:48

عمران خان کی 6 اور بشری بی بی کی ایک مقدمے میں عبوری ضمانتوں میں توسیع

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔15 جولائی ۔2025 )عدالت نے سابق وزیراعظم عمران خان اور ان کی اہلیہ بشری بی بی کی عبوری ضمانتوں میں توسیع کر دی ہے ڈسٹرکٹ اینڈ سیشن کورٹس اسلام آباد میں عمران خان کی 6 اور ان کی اہلیہ بشری بی بی کی ایک ضمانت قبل از گرفتاری کی درخواست پر سماعت ہوئی، ایڈیشنل ڈسٹرکٹ اینڈ سیشن جج افضل مجوکا نے درخواستوں پر سماعت کی. سماعت کے دوران عمران خان کی ضمانت کی درخواستوں پر آج بھی دلائل نہیں ہوسکے جبکہ بشری بی بی کی ضمانت کی درخواست پر محفوظ فیصلہ بھی نہیں سنایا جا سکا، سابق وزیراعظم کی عدم دستیابی کے باعث ضمانت کی درخواستوں پر کوئی پیشرفت نہیں ہوئی یاد رہے کہ عدالت نے گزشتہ سماعت پر پی ٹی آئی کے بانی چیئرمین کو پیش کرنے یا بذریعہ ویڈیو لنک حاضری کے احکامات جاری کیے تھے۔

(جاری ہے)

سماعت کے بعد عدالت نے ضمانت قبل از گرفتاری کی درخواستوں پر سماعت 9 ستمبر تک ملتوی کردی، آج عمران خان کی جانب سے خالد یوسف چوہدری ایڈووکیٹ عدالت میں پیش ہوئے. واضح رہے کہ سابق وزیراعظم عمران خان پر احتجاج، توڑ پھوڑ، اقدام قتل کی دفعات کے تحت 5 مقدمات درج ہیں جبکہ عمران خان اور بشری بی بی کے خلاف توشہ خانہ میں جعلی رسیدیں جمع کروانے پر بھی ایک مقدمہ درج ہے.