Live Updates

پی ٹی آئی کے مرکزی رہنماء خواجہ فاروق احمد، سابق وزیر اعظم پاکستان عمران خان کی رہائی کے لیے جاری تحریک میں زیادہ سے زیادہ لوگوں کی شرکت کو یقینی بنانے کے لیے متحرک

منگل 15 جولائی 2025 22:53

چناری (اُردو پوائنٹ اخبارتازہ ترین - آن لائن۔ 15 جولائی2025ء)قانون ساز اسمبلی آزاد کشمیر میں قائد حزب اختلاف،پی ٹی آئی کے مرکزی رہنماء خواجہ فاروق احمد، سابق وزیر اعظم پاکستان عمران خان کی رہائی کے لیے جاری تحریک میں زیادہ سے زیادہ لوگوں کی شرکت کو یقینی بنانے کے لیے متحرک،عوامی رابطہ مہم پر جہلم ویلی کے ضلعی ہیڈ کوارٹر ہٹیاں بالا پہنچ گئے،اپوزیشن لیڈر خواجہ فاروق احمد نے ہٹیاں بالا میں پی ٹی آئی آزاد کشمیر کے مرکزی نائب صدر سید زیشان حیدر کاظمی کے ہمراہ پی ٹی آئی جہلم ویلی کے عہدیداران،کارکنان سے ملاقاتیں کیں ،حال ہی میں وفات پانے والے کارکنان و دیگر کے گھروں میں جا کر تعزیت،دعائے مغفرت کی،اس موقع پر پی ٹی آئی مجلس عاملہ کے رکن تصویر نقوی، سٹی چیف آرگنائزر وقار شیخ، ایڈووکیٹ شاہد ہمدانی، یوتھ رہنما عامر روشن اعوان، آئی ایس ایف رہنما حمزہ میر، سٹی سیکرٹری اطلاعات ناصر اعوان، خاور رزاق عباسی، شفاقت خان، مقصود ہمدانی، شجاعت ہمدانی، عدنان خان اور دیگر کارکنان بھی موجود تھے،میڈیا سے گفتگو کرتے ہوئے اپوزیشن لیڈر خواجہ فاروق احمد نے کہا کہ 26 جولائی کو مظفرآباد میں پی ٹی آئی ڈویژنل سطح کا مشترکہ اجلاس منعقد کیا جائے گا، جس میں عمران خان کی رہائی کے لیے جاری احتجاجی تحریک کے آئندہ مرحلوں کی جامع حکمت عملی طے کی جائے گی،عمران خان گزشتہ دو سال سے بے گناہی کی حالت میں قید ہیں،ریاست جموں و کشمیر کے دونوں اطراف کے کشمیری عوام انہیں اپنا نجات دہندہ اور اُمید کی آخری کرن سمجھتے ہیں، ایک باوقار، خودمختار اور مستحکم پاکستان ہی کشمیر کی آزادی کا ضامن بن سکتا ہے،عمران خان کی قیادت میں یہی پاکستان اب ابھرنے جا رہا ہے، ظلم و جبر کا نظام زیادہ دیر قائم نہیں رہ سکتا، تبدیلی کی گھڑی قریب ہے،کارکنان پارٹی کو مضبوط کرنے کے لیے جہدوجہد تیز کریں ،ان شاء اللہ جلد عمران خان دوبارہ پاکستان کے وزیر اعظم بنیں گے ۔