Live Updates

لاہور میں لگاتار موسلادھار بارش کا نیا ریکارڈ قائم، ایک ہی خاندان کے 5 افراد سمیت 10 شہری جاں بحق

محکمہ موسمیات نے آئندہ 24 گھنٹوں میں مزید موسلادھار بارشوں کی پیشگوئی کردی، مون سون سپیل 17 جولائی تک جاری رہنے کا امکان

ساجد علی بدھ 16 جولائی 2025 10:59

لاہور میں لگاتار موسلادھار بارش کا نیا ریکارڈ قائم، ایک ہی خاندان کے ..

لاہور ( اُردو پوائنٹ اخبارتازہ ترین۔ 16 جولائی 2025ء ) صوبہ پنجاب کے دارالحکومت لاہور سمیت گردونواح میں رات بھر ہونے والی موسلا دھار بارش سے متعددعلاقے زیر آب آگئے، حادثات میں ایک ہی خاندان کے 5 افراد سمیت 10 شہری جاں بحق ہوگئے۔ تفصیلات کے مطابق لاہور کے علاقے پانی والا تالاب میں سب سے زیادہ 171 ملی میٹر، اقبال ٹاؤن میں 169 ملی میٹر، تاجپورہ میں 167 ملی میٹر، بارش ریکارڈ کی گئی جو رواں مون سون سیزن کی بلند ترین مقدار ہے، اس کے علاوہ مغلپورہ میں 135، لکشمی چوک میں 133 ملی میٹر بارش ریکارڈ ہوئی۔

بتایا گیا ہے کہ شدید بارش کے باعث ٹھوکر نیاز بیگ کے علاقے میں افسوسناک حادثہ پیش آیا، جہاں ایک گھر کی چھت گرنے سے ایک ہی خاندان کے 5 افراد جاں بحق اور 2 زخمی ہو گئے، جاں بحق افراد میں 60 سالہ مانگا، 55 سالہ عشرت، 35 سالہ رانی، 4 سالہ لطیفہ اور 3 سالہ خدیجہ شامل ہیں، زخمیوں میں 30 سالہ فیصل اور 5 سالہ ببلی شامل ہیں، زخمیوں کو فوری طبی امداد کے لیے ہسپتال منتقل کر دیا گیا، اس کے علاوہ رائیونڈ کے علاقے مشن کالونی میں مکان کی چھت گرنے سے 3 افراد جان کی بازی ہار گئے، ایک شخص کو زندہ نکال لیا گیا اور ہربنس پورہ میں کرنٹ لگنے سے 2 بچے دم توڑ گئے۔

(جاری ہے)

علاوہ ازیں اسلام آباد اور راولپنڈی میں بھی شدید بارش ہوئی، پنجاب کے مختلف شہروں ڈسکہ، حافظ آباد، وزیرآباد، سانگلہ ہل، گوجرانوالہ، فیصل آباد، ننکانہ صاحب، منچن آباد، بہاولنگر، پاکپتن، عارف والا، قصور اور فاروق آباد میں بارش کی وجہ سے نشیبی علاقے زیرآب آگئے، آزاد کشمیر کے مختلف علاقوں میں بھی وقفے وقفے سے بارش کا سلسلہ جاری ہے جب کہ محکمہ موسمیات نے آئندہ 24 گھنٹوں میں پنجاب کے بیشتر اضلاع میں مزید موسلادھار بارشوں کی پیشگوئی کی ہے، مون سون کا یہ سپیل 17 جولائی تک جاری رہنے کا امکان ہے، خیبرپختونخوا کے مختلف اضلاع میں شدید بارش اور لینڈ سلائیڈنگ کا خدشہ ہے، اس حوالے سے این ڈی ایم اے نے الرٹ جاری کر دیا۔