وفاقی کابینہ اجلاس،ای او بی آئی پنشن میں 15فیصد اضافے اورجان بچانے والی ادویات کی درآمد پر 5 سال کیلئے مزید استشنیٰ کی منظوری

ای او بی آئی پنشنرز کی پنشن میں اضافے کا اطلاق یکم جنوری 2025 سے کیا جائے گا، یہ ادویات صرف ہسپتالوں اور متعلقہ اداروں میں دستیاب ہوں گی اور ان کی کھلے عام فروخت پر پابندی ہو گی اور ادویات کی درآمد کیلئے پہلے لائسینسنگ اتھارٹی سے منظوری درکار ہو گی

فیصل علوی بدھ 16 جولائی 2025 16:30

وفاقی کابینہ اجلاس،ای او بی آئی پنشن میں 15فیصد اضافے اورجان بچانے والی ..

اسلام آباد(اردوپوائنٹ اخبار تازہ ترین۔16جولائی 2025)وفاقی کابینہ نے ای او بی آئی پنشنرز کی پنشن میں 15فیصد اضافے اورجان بچانے والی ادویات کی درآمد پر 5 سال کیلئے مزید استشنیٰ کی منظوری دیدی، ای او بی آئی پنشنرز کی پنشن میں 15فیصد اضافے کا اطلاق یکم جنوری 2025سے کیا جائے گا،وزیراعظم آفس سے جاری بیان کے مطابق شہباز شریف کی زیر صدارت وفاقی کابینہ کا اجلاس آج وزیراعظم ہاؤس اسلام آباد میں منعقد ہوا۔

وفاقی کابینہ اجلاس میں متعدد اہم معاشی اور سماجی فیصلوں کی منظوری دے دی گئی۔وفاقی کابینہ نے وزارت سمندر پار پاکستانی و ترقی انسانی وسائل کی سفارش پر ایمپلائیز اولڈ ایج بینیفٹس انسٹیٹیوشن کی پینشن میں 15 فیصد اضافے کی منظوری دے دی جس کا اطلاق یکم جنوری 2025 سے ہو گا۔

(جاری ہے)

پینشن میں یہ اضافہ ادارہ اپنے وسائل سے پورا کرے گا۔وزیراعظم نے ایمپلائیز اولڈ ایج بینیفٹس انسٹیٹیوشن) میں اداراتی اصلاحات کے حوالے سے کابینہ کی کمیٹی تشکیل کرنے کی ہدایت کی۔

مستقبل میں پنشنرز کو مزید سہولیات میسر آسکیں اور ادارے کی استعدادکار بہتر بنائی جا سکے۔یہ کمیٹی ادارے کی اصلاحات کے ساتھ ساتھ غیر منظم لیبر سیکٹر جیسا کہ گھریلو ملازمین، کاشتکاری سے وابستہ ملازمین اور اس طرح کے دیگر شعبوں کے ملازمین جنہیں اب تک نظر انداز کیا جاتا رہا۔ اولڈ ایج بینیفٹس کی فراہمی کے حوالے سے تجاویز پر غور و خوض کرے گی۔

غیر منظم سیکٹر کی اصلاحات سے اب تک نظر انداز کئے گئے سیکٹرز کے ملازمین کو انکے حقوق ملیں گے۔وفاقی کابینہ نے وزارت قومی صحت کی سفارش پر ہسپتالوں اور متعلقہ صحت کے اداروں میں استعمال ہونے والی انسداد کینسر، دل کے امراض اور زندگی بچانے والی ادویات کی درآمد پر میں پانچ سال کی مزید استثنٰی کی منظوری دے دی۔یہ ادویات انسانی زندگیوں کو بچانے کیلئے انتہائی اہم ہیں اور ان کی فوری دستیابی کی ضرورت کو مدنظر رکھتے ہوئے یہ استثنیٰ دیا گیا ہے۔

یہ ادویات صرف ہسپتالوں اور متعلقہ اداروں میں دستیاب ہوں گی اور ان کی کھلے عام فروخت پر پابندی ہو گی اور ان ادویات کی درآمد کیلئے پہلے لائسینسنگ اتھارٹی سے منظوری درکار ہو گی۔وفاقی کابینہ نے سی کیرج شپنگ ڈاکومنٹس بل میں ترمیم کی منظوری دے دی، جس سے بحری تجارت سے متعلق دستاویزی عمل مزید آسان اور عالمی معیار سے ہم آہنگ ہو سکے گا۔ وفاقی کابینہ نے وزارت بحری امور کی سفارش پر سی کیرج شپنگ ڈاکیومینٹس بل 2025 کے مسودے کے حوالے سے ضروری قانونی کاروائی شروع کرنے کی منظوری دے دی۔وفاقی کابینہ نے کابینہ کمیٹی برائے لیجسلیٹو کیسز کے 2 جولائی 2025 اور 3 جولائی 2025 کو ہوئے اجلاس میں لئے گئے فیصلوں کی توثیق کردی۔