ؤلاہور سمیت پنجاب کے 189 شہروں میں ترقیاتی منصوبے، 66 شہروں میں ترجیحی بنیادوں پر کام کا آغاز

۔وزیراعلیٰ مریم نواز کی زیر صدارت اجلاس، لاہور ڈویلپمنٹ پروگرام فیز ون نومبر 2025 میں مکمل ہوگا، ڈپٹی کمشنر لاہور کی بریفنگ

بدھ 16 جولائی 2025 19:35

ِ لاہور (اُردو پوائنٹ اخبارتازہ ترین - آن لائن۔ 16 جولائی2025ء) وزیراعلیٰ پنجاب مریم نواز شریف کی زیر صدارت اعلیٰ سطح کا خصوصی اجلاس منعقد ہوا جس میں لاہور ڈویلپمنٹ پروگرام اور پنجاب ڈویلپمنٹ پلان پر جاری پیشرفت کا تفصیلی جائزہ لیا گیا۔ اجلاس میں ڈپٹی کمشنر لاہور نے فیز ون کے منصوبوں پر ہونے والی پیش رفت پر بریفنگ دی۔فیز ون کے 5643 میں سے 2593 ترقیاتی منصوبے مکمل کر لیے گئے ہیں۔

لاہور میونسپل کارپوریشن کے 3705 میں سے 2274 منصوبے اور واسا لاہور کے 252 میں سے 170 منصوبے پایہ تکمیل کو پہنچ چکے ہیں۔ واسا کے دیگر 1573 منصوبوں پر بھی تیزی سے کام جاری ہے۔وزیراعلیٰ مریم نواز نے ہدایت کی کہ لاہور کی سڑکوں اور گلیوں کی خوبصورتی اور بیوٹیفکیشن پر بھی خصوصی توجہ دی جائے۔ لاہور ڈویلپمنٹ پلان کے فیز ون کی تکمیل کی حتمی ڈیڈ لائن نومبر 2025 مقرر کی گئی ہے، جبکہ فیز ٹو میں علامہ اقبال، واہگہ، اور عزیز بھٹی ٹاؤن کی 146 ترقیاتی سکیمیں شامل کی جائیں گی۔

(جاری ہے)

اجلاس میں وزیراعلیٰ کو پنجاب کے 189 شہروں میں جاری ترقیاتی و بحالی منصوبوں کی تفصیلی رپورٹ بھی پیش کی گئی۔ فیصلہ کیا گیا کہ جن علاقوں کی حالت زیادہ خراب ہے، انہیں پروگرام میں فوری ترجیح دی جائے گی۔ پنجاب کے 66 شہروں میں واٹر ٹینکس، ڈرین اور ڈسپوزل سٹیشنز جیسے اہم ترقیاتی منصوبے شروع کیے جائیں گے۔وزیراعلیٰ مریم نواز شریف نے عزم ظاہر کیا کہ پنجاب کا کوئی شہر اب ترقی کے ثمرات سے محروم نہیں رہے گا، 189 شہروں کو خوبصورت اور جدید سہولیات سے آراستہ کیا جائے گا۔