وفاقی وزیر داخلہ کی زیر صدارت اجلاس، ملک کی حفاظت کی غرض سے بہادری کا مظاہرہ کرنے والوں کیلئے سول ایوارڈز کی نامزدگی کا جائزہ لیا گیا

جمعرات 17 جولائی 2025 10:50

اسلام آباد (اُردو پوائنٹ اخبارتازہ ترین - اے پی پی۔ 17 جولائی2025ء) وفاقی وزیر داخلہ محسن نقوی کی زیر صدارت کابینہ ڈویژن میں اہم اجلاس ہوا جس میں ملک و قوم کی حفاظت کیلئے بہادری اور شجاعت کا مظاہرہ کرنے والوں کیلئے سول ایوارڈز کی نامزدگی کا جائزہ لیا گیا۔ وزارت داخلہ کی طرف سے جاری بیان کے مطابق اجلاس میں مجموعی طور پر 71 افراد کیلئے مختلف سول اعزازات کی منظوری دی گئی ۔

وزیر داخلہ محسن نقوی نے اجلاس سے خطاب کرتے ہوئے کہا کہ ملک و قوم کی حفاظت کیلئے جان نچھاور کرنے والوں اور غیر معمولی بہادری کا مظاہرہ کرنے والوں کی حوصلہ افزائی انتہائی ضروری ہے۔محسن نقوی نے کہا کہ ان لوگوں نے اپنی جانوں کی پرواہ کیے بغیر ملک کی بے مثل خدمت کی ہے، قوم ان بہادر سپوتوں کی ہمیشہ مشکور رہے گی۔

(جاری ہے)

وزیر داخلہ نے کہا کہ شہدائے وطن ہمارے سر کا تاج ہیں، ان کی لازوال قربانیوں کو ہمیشہ یاد رکھا جائے۔

انہوں نے کہا کہ غازی قوم کے ہیرو ہیں اور ان کی جرات پر سب کو ناز ہے۔محسن نقوی نے کہا کہ شہدا اور غازیوں کی قربانیوں کو ہرگز رائیگاں نہیں جانے دیا جائے گا۔ اجلاس میں سپیشل سیکرٹری داخلہ، ایڈیشنل سیکرٹری داخلہ، ایڈیشنل سیکرٹری کابینہ ڈویژن، ڈپٹی ڈی جی آئی بی اور اعلی حکام نے شرکت کی جبکہ تمام صوبوں اور آزاد کشمیر اور گلگت بلتستان کے ایڈیشنل چیف سیکرٹریز اور سیکرٹریز داخلہ نے بذریعہ زوم اجلاس میں شرکت کی۔\932