Live Updates

علیمہ خان کے دوسرے بیٹے شیر شاہ کی بھی جناح ہائوس حملہ کیس میں درخواست ضمانت منظور

جمعرات 4 ستمبر 2025 17:16

لاہور(اُردو پوائنٹ اخبارتازہ ترین - این این آئی۔ 04 ستمبر2025ء)نسداد دہشتگردی کی خصوصی عدالت نے علیمہ خان کے دوسرے بیٹے شیر شاہ کی بھی جناح ہائوس حملہ کیس میں درخواست ضمانت منظور کرلی۔انسداد دہشتگردی کی خصوصی عدالت کے جج منظر علی گل نے محفوظ فیصلہ سنایا۔بانی پی ٹی آئی عمران خان کی بہنیں علیمہ خان اور عظمی خان عدالت پہنچیں جبکہ سابق وفاقی وزیر شاہ محمود قریشی کی اہلیہ بھی عدالت میں موجود تھیں۔

بانی پی ٹی آئی کے بھانجے شیر شاہ کی جناح ہائوس کیس میں درخواست ضمانت پر رانا مدثر عمر ایڈوکیٹ نے دلائل دیتے ہوئے موقف اپنایا کہ اس مقدمہ میں ابھی تک ملزم کی حد تک چالان نہیں آیا، ٹرائل نہ جانے کب شروع ہو لہٰذالامحدود وقت تک ملزم کو قید نہیں رکھا جاسکتا۔شیر شاہ کے خلاف پولیس فائل پر کوئی بیان موجود نہیں ، 28 ماہ تک گرفتاری نہیں کی گئی اچانک گرفتار کر لیا گیا، بانی پی ٹی آئی کی فیملی ہونے کے باعث انتقامی کاروائیاں کی جا رہی ہیں۔

(جاری ہے)

شیر شاہ کے وکیل نے بتایا کہ ملزم کے خلاف ریکارڈ پر کوئی ثبوت نہیں ہے اور ملزم کسی ہنگامہ آرائی میں بھی ملوث نہیں جب کہ ایسے ملزمان جن پر شیر شاہ سے زیادہ سنگین الزامات تھے انہیں ضمانت دے دی گئی ہے۔انہوں نے کہا کہ شیر شاہ سے ڈنڈے کی پلانٹڈ ریکوری کرائی گئی، شریک ملزم کے بیان کی روشنی میں گرفتاری پر یہ عدالت ڈاکٹر یاسمین راشد کو مقدمے سے ڈسچارج کر چکی ہے، اس مقدمے گرفتار تمام ملزمان کی ضمانت منظور ہو چکی ہے۔

وکیل رانا مدثر نے عدالت کو بتایا کہ شیرشاہ پر ایسا کوئی الزام نہیں کہ اس نے توڑ پھوڑ کی ہو ، صرف ایک ملزم کی نشاندہی پر کسی دوسرے کو ملوث نہیں کیا جاسکتا۔استدعا عدالت شیر شاہ کی ضمانت منظور کر کے رہا کرنے کا حکم دے۔جس پر لاہور کی انسداد دہشتگردی عدالت نے جناح ہائوس کیس میں شیر شاہ کی ضمانت منظور کر لی، عدالت نے ایک لاکھ کے ضمانتی مچلکوں کے عوض ضمانت منظور کی۔یاد رہے کہ عدالت نے بدھ کے روز عمران خان کے بھا نجے شاہ ریز خان کی بھی ضمانت منظور کرتے ہوئے رہا کرنے کا حکم سنایا تھا۔