قلات فائرنگ واقعہ؛ ماجد علی صابری قوال گروپ کے 3 افراد بھی جاں بحق

قوال گروپ کوئٹہ میں ہونے والی شادی کی تقریب میں شرکت کے لیے کراچی سے روانہ ہوا تھا

ساجد علی جمعرات 17 جولائی 2025 11:34

قلات فائرنگ واقعہ؛ ماجد علی صابری قوال گروپ کے 3 افراد بھی جاں بحق

قلات ( اُردو پوائنٹ اخبارتازہ ترین۔ 17 جولائی 2025ء ) صوبہ بلوچستان کے علاقے قلات میں مسافر بس پر فائرنگ کے افسوسناک واقعے میں کراچی کے معروف ماجد علی صابری قوال گروپ کے 3 افراد جاں بحق اور متعدد زخمی ہو گئے۔ میڈیا رپورٹس کے مطابق جاں بحق ہونے والوں میں احمد علی صابری، نوجوان رضا علی صابری اور ساون سمیت دیگر شامل ہیں، شہر قائد کے علاقہ پی آئی بی کالونی میں مقیم گائیکی سے وابستہ 14 رکنی گروپ ماجد علی صابری گروپ کے نام سے جانا جاتا ہے جو کوئٹہ میں شادی کی ایک تقریب میں شرکت کے لیے حاجی امتیاز لہڑی کی دعوت پر بدھ کی صبح ساڑھے سات بجے کراچی سے روانہ ہوا تھا۔

بتایا گیا ہے کہ بلوچستان کے علاقہ قلات کے قریب سفر کے دوران منزل سے صرف پونے گھنٹے کی مسافت پر نامعلوم افراد کی جانب سے مسافر بس پر فائرنگ کردی، گروپ کے رکن ندیم علی عرف بنییا بھائی نے واقعے سے متعلق بتایا کہ قوال گروپ ایک قافلے میں ساؤنڈ سسٹم اور دیگر آلات کے ہمراہ روانہ ہوا تھا، ہم تو قوالی اور نعت شریف پڑھنے والے لوگ ہیں، پتہ ہوتا کہ ایسا کچھ ہو جائے گا تو گھر سے ہی باہر نہ نکلتے۔

(جاری ہے)

معلوم ہوا ہے کہ واقعے کے بعد پی آئی بی کالونی میں سوگ کا عالم ہے، ماجد علی صابری کے گھر تعزیت کرنے والوں کا تانتا بندھا ہوا ہے جہاں رقت آمیز مناظر دیکھنے میں آ رہے ہیں جب کہ مرحوم امجد صابری کے چھوٹے بھائی طلحہٰ صابری نے اس سلسلے میں وضاحت کرتے ہوئے بتایا کہ فائرنگ کا نشانہ بننے والے قوالوں کا امجد صابری خاندان سے تعلق نہیں، تاہم وہ کراچی کی قوال برادری کا حصہ ہیں، ہم فائرنگ کے اس واقعے میں جاں بحق افراد کے لیے دعائے مغفرت اور زخمیوں کی جلد صحتیابی کی دعا کرتے ہیں۔