بھارتی فوج نے لداخ میں آکاش پرائم ایئر ڈیفنس سسٹم کا تجربہ کرلیا

برازیل ’’آکاش میزائل سسٹم‘‘ کو غیر تسلی بخش قرار دے چکا ہے،رپورٹ

جمعرات 17 جولائی 2025 16:39

لیہہ (اُردو پوائنٹ اخبارتازہ ترین - این این آئی۔ 17 جولائی2025ء) بھارتی فوج نے لداخ سیکٹر میں 15ہزارسے زائد فٹ کی بلندی پر مقامی طور پر تیار کردہ آکاش پرائم ایئر ڈیفنس سسٹم کاتجربہ کیا ہے۔کشمیرمیڈیاسروس کے مطابق یہ تجربہ آرمی ایئر ڈیفنس نے ڈیفنس ریسرچ اینڈ ڈیولپمنٹ آرگنائزیشن کے سینئر حکام کی موجودگی میں کیاجس نے یہ نظام تیار کیا ہے۔

بھارتی فوج نے تجربے کی کایابی کا دعویٰ کرتے ہوئے کہا ہے کہ زمین سے فضا میں مار کرنے والے میزائلوں نے انتہائی اونچائی والے علاقے میں اہداف کوکامیابی سے نشانہ بنایا ۔آکاش پرائم ایئر ڈیفنس سسٹم پر میزائل کو 4500 میٹر تک کی بلندی پر نصب کیا جا سکتا ہے اور 25-30 کلومیٹر کے فاصلے پر ہدف کو نشانہ بنایا جا سکتا ہے۔یاد رہے کہ چند روز قبل خبر آئی تھی کہ بھارت کے مقامی طور پر تیار کردہ زمین سے فضا میں مار کرنے والے میزائل سسٹم آکاش کو بین الاقوامی دفاعی مارکیٹ میں بڑا جھٹکالگا ہے کیونکہ برازیل نے 'آکاش' میزائل کی خریداری کے حوالے سے بھارت کیساتھ جاری بات چیت کو فی الحال روک دیا ہے۔

(جاری ہے)

میڈیا رپورٹس کے مطابق برازیل نے میزائل کی کارکردگی کو کچھ اہم آپریشنل پیرامیٹرز میں غیر تسلی بخش پایا ہے۔رپورٹس میں کہا گیا تھا کہ برازیل نے 'آکاش' کو تیز رفتار اور کم اونچائی والے اہداف سے نمٹنے میں کم موثر پایا ہے۔ آج کے ہائبرڈ جنگی منظر نامے میں جہاں ڈرونز، کروز میزائلوں اور سمارٹ بموں کے استعمال میں تیزی سے اضافہ ہوا ہے، ایسے میںبرازیل کو لگتا ہے کہ 'آکاش' موجودہ خطرات کا سامنا کرنے کی پوری صلاحیت نہیں رکھتا۔