Live Updates

پٹرول اور ڈیزل مہنگا ہونے کے بعد پبلک ٹرانسپورٹ کرایوں میں بڑا اضافہ

جمعرات 17 جولائی 2025 16:49

مکوآنہ (اُردو پوائنٹ اخبارتازہ ترین - این این آئی۔ 17 جولائی2025ء)پٹرول اور ڈیزل مہنگا ہونے کے بعد پبلک ٹرانسپورٹ کرایوں میں بڑا اضافہ۔ تفصیلات کے مطابق وفاقی حکومت کی جانب سے پٹرول اور ڈیزل مہنگا کرنے کے بعد اس فیصلے کے منفی اثرات عوام پر پڑنے لگے ہیں۔ پٹرولیم مصنوعات کی قیمتوں میں 12 روپے فی لیٹر اضافے کے بعد پبلک ٹرانسپورٹ اور مزدا ایسوسی ایشنز نے حکومتی نوٹیفکیشن کے بغیر ہی ازخود کرایوں میں 5 فیصد تک اضافہ کر دیا ہے۔

پٹرولیم مصنوعات کی قیمتوں میں اضافے کا بوجھ براہِ راست عوام پر ڈالا جا رہا ہے، کرایوں میں اضافے سے متعلق ٹرانسپورٹ اتھارٹی یا متعلقہ حکام کی جانب سے کوئی باضابطہ اعلامیہ جاری نہیں کیا گیا۔ واضح رہے کہ وفاقی حکومت کی جانب سے رواں ماہ کے دوران دوسری مرتبہ عوام پر پٹرول بم گرایا گیا ہے۔

(جاری ہے)

حکومت نے پٹرول اور ہائی سپیڈ ڈیزل کی قیمتوں میں اضافہ کردیا ہے۔

16جولائی سے 31جولائی تک پٹرول کی قیمت میں 5روپے 36 پیسے اور ہائی اسپیڈ ڈیزل کی قیمت میں 11روپے 37پیسیفی لیٹر اضافہ کیا گیا ہے۔ وزارت خزانہ کی طرف سے جاری نوٹیفکیشن کے مطابق پٹرولیم مصنوعات کی قیمتوں میں ردوبدل کیا گیا ہے،پیٹرول کی 5روپے 36 پیسے اضافے کے بعد 272روپے 15پیسے لیٹر، ہائی اسپیڈ ڈیزل کی قیمت میں 11روپے 37 پیسے اضافے کے بعد 284روپے 35 پیسے لیٹر کردیا ہے۔

دوسری جانب اس فیصلے پر جماعت اسلامی کی جانب سے شدید ردعمل دیا گیا ہے۔ جماعت اسلامی نے مہنگائی اور شوگر مافیا کے خلاف ملک گیر احتجاج کا اعلان کیا ہے۔ امیر جماعت اسلامی کے مطابق فارم47 سے مسلط جعلی حکومت نے عوام کا جینا محال کردیا ہے، ن لیگ اور پیپلزپارٹی کا اتحاد اور شوگر مافیا کی سرپرستی تباہ کن ثابت ہورہی ہے، جمعہ اور اتوار کو ملک گیرمظاہرے ہوں گے