پیٹرول اور ڈیزل پرچلنے والی گاڑیوں پر 3 فیصد تک لیوی کے نفاذ کا نوٹیفکیشن جاری

جمعہ 18 جولائی 2025 16:08

کراچی(اُردو پوائنٹ اخبارتازہ ترین - این این آئی۔ 18 جولائی2025ء)ایف بی آر نے پیٹرول اور ڈیزل پر چلنے والی گاڑیوں پر نئی لیوی کے نفاذ کا نوٹیفکیشن جاری کردیا، 1300 سی سی سے چھوٹی مقامی اور درآمدی گاڑیوں پر ایک فیصد لیوی نافذ کردی گئی۔فیڈرل بورڈ آف ریونیو کے مطابق پیٹرول، ڈیزل پر چلنے والی گاڑیوں پر نئی لیوی کے نفاذ کا نوٹیفکیشن جاری کردیا گیا ہے۔

نوٹیفکیشن کے مطابق لیوی کو انرجی وہیکل آڈیپشن لیوی کا نام دیا گیا ہے۔

(جاری ہے)

ایف بی آرحکام کے مطابق لیوی کا مقصد پیٹرول، ڈیزل گاڑیوں کے استعمال کی حوصلہ شکنی ہے، 1300 سی سی سے چھوٹی مقامی اور درآمدی گاڑیوں پر ایک فیصد لیوی نافذ کی گئی ہے، مقامی و درآمدی پک اپ گاڑیوں، بسوں اور ٹرکوں پر بھی ایک فیصد لیوی عائد ہوگی۔رپورٹ کے مطابق 1300 سے 1800 سی سی تک کی گاڑیوں پر 2 فیصد انرجی وہیکل لیوی عائد ہوگی جبکہ 1800 سی سی سے بڑی مقامی یا درآمدی گاڑیوں پر 3 فیصد لیوی لاگو ہوگئی۔

ایف بی آر کے مطابق پاکستان میں مینوفیکچر یا اسمبلڈ شدہ گاڑیوں پر مینوفیکچرر لیوی ادا کرے گا، درآمدی گاڑیوں پر متعلقہ شخص انرجی وہیکل آڈیپشن لیوی ادا کرنے کا پابند ہوگا، لیوی کا مقصد الیکٹرک گاڑیوں کے استعمال کیلئے صارفین کو راغب کرنا ہے۔