شالیمار ریکارڈنگ کمپنی کے ملازمین کے روزگار کے تحفظ کے لئے ضروری ہے کہ کمپنی بحال ہو، وزیراطلاعات

جمعہ 18 جولائی 2025 21:06

اسلام آباد (اُردو پوائنٹ اخبارتازہ ترین - این این آئی۔ 18 جولائی2025ء)وفاقی وزیر اطلاعات و نشریات عطاء اللہ تارڑ نے کہا ہے کہ شالیمار ریکارڈنگ کمپنی کی بحالی کے لئے بزنس پلان عدالت میں جمع کروایا جائے گا، کمپنی کے 300 سے زائد ملازمین کے روزگار کے تحفظ کے لئے ضروری ہے کہ کمپنی بحال ہو، ماضی کی ایک حکومت نے غیر ذمہ دارانہ بیان دے کر پی آئی اے کو اربوں کا نقصان پہنچایا، خیبر پختونخوا حکومت میں کرپشن اور نااہلی عروج پر ہے۔

جمعہ کو یہاں اسلام آباد ہائی کورٹ کے باہر میڈیا سے گفتگو کرتے ہوئے وفاقی وزیر اطلاعات نے کہا کہ ایس آر بی سی کمپنی کی بحالی کیلئے عدالت سے استدعا کرنے آئے تھے، عدالت میں اپنا موقف پیش کیا ہے۔ انہوں نے کہا کہ کمپنی کے 300 سے زیادہ ملازمین ہیں، ان کے روزگار کے تحفظ کے لئے ضروری ہے کہ کمپنی بحال ہو۔

(جاری ہے)

وفاقی وزیر نے کہا کہ عدالت نے بزنس پلان جمع کروانے کے لئے احکامات جاری کئے ہیں، کمپنی کی بحالی کے لئے بزنس پلان جمع کروایا جائے گا۔

انہوں نے کہا کہ چونکہ ملازمین کی تنخواہیں اکائونٹ میں آ چکی تھیں، عدالت نے لیکویڈیٹر کو ہدایت کی ہے کہ ایس آر بی سی کے ملازمین کو تنخواہوں کی ادائیگی کی جائے۔ انہوں نے کہا کہ سماعت قانون کے مطابق ہو رہی ہے۔ ایک سوال کے جواب میں وفاقی وزیر اطلاعات نے کہا کہ ماضی کی ایک حکومت نے غیر ذمہ دارانہ بیان دے کر پی آئی اے کو اربوں کا نقصان پہنچایا، اللہ تعالیٰ کا شکر ہے کہ ہمارے دور میں پی آئی اے کی پروازیں یورپ اور برطانیہ کے لئے بحال ہوئی ہیں۔ ایک اور سوال کے جواب میں انہوں نے کہا کہ خیبر پختونخوا میں نااہلی کی انتہا ہے، کرپشن، بد انتظامی عروج پر ہے، دریائے سوات میں یہ سیاحوں کو بچا نہیں سکے۔ انہوں نے کہا کہ خیبر پختونخوا میں کرپشن کے انبار لگے ہوئے ہیں۔