سینیٹ انتخابات،ناراض پی ٹی آئی رہنمائوں اور علی امین گنڈاپور میں مذاکرات ناکام

سینیٹ انتخابات میں پی ٹی آئی کی مرکزی قیادت میں بھی اختلافات، عاطف خان، شیر علی ارباب اور جنید اکبر بھی ناراض رہنمائوں کے حامی

جمعہ 18 جولائی 2025 19:45

اسلام آباد(اُردو پوائنٹ اخبارتازہ ترین۔ 18 جولائی2025ء)سینیٹ انتخابات پر پی ٹی آئی امیدواروں کے درمیان اختلافات کے معاملے پر ناراض تحریکِ انصاف کے رہنمائوں اور وزیرِ اعلیٰ کے پی علی امین گنڈاپور کے درمیان مذاکرات ناکام ہو گئے۔ذرائع کے مطابق ناراض امیدواروں میں عرفان سلیم، عائشہ بانو، ارشاد حسین اور وقاص اورکزئی شامل ہیں، جنہوں نے سینیٹ انتخابات سے دستبردار نہ ہونے کا فیصلہ برقرار رکھا ہے۔

ذرائع نے بتایا کہ بیرسٹر گوہر اور سلمان اکرم راجہ ناراض سینیٹ امیدواروں کی وزیرِ اعلیٰ علی امین گنڈاپور سے ملاقات کرانے گئے تھے۔

(جاری ہے)

ناراض رہنمائوں کا گزشتہ ملاقات میں موقف تھا کہ ہم کسی صورت کاغذاتِ نامزدگی واپس نہیں لیں گے۔ناراض رہنمائوں نے مطالبہ کیا کہ اگر ہم کاغذات واپس لیں تو جے یو آئی اور پیپلز پارٹی ایک، ایک سیٹ سے دستبردار ہو جائیں۔

ذرائع نے بتایا سینیٹ انتخابات میں پی ٹی آئی کی مرکزی قیادت میں بھی اختلافات ہیں، سلمان اکرم راجہ چاہتے ہیں کہ دیرینہ کارکنوں کو موقع ملے۔ذرائع کے مطابق عاطف خان، شیر علی ارباب اور جنید اکبر بھی ناراض رہنمائوں کے حامی ہیں۔ذرائع نے بتایا کہ علی امین گنڈاپور بلا مقابلہ انتخابات اور سینیٹ کے موجودہ امیدواروں کے حق میں ہیں۔