شیخ نھیان بن مبارک کی پاکستان کے سب سے بڑے جشن آزادی پروگرام میں شرکت

60 ہزار سے زائد شرکاء کی شرکت، ممتاز پاکستانی شخصیات کو اعزازات

اعجاز احمد گوندل ہفتہ 16 اگست 2025 04:51

شیخ نھیان بن مبارک کی پاکستان کے سب سے بڑے جشن آزادی پروگرام میں شرکت

دبئی (اُردو پوائنٹ اخبارتازہ ترین۔ 14 اگست2025ء) دبئی ایکسپو سٹی میں پاکستان کے 78ویں یومِ آزادی کی شاندار تقریب منعقد ہوئی جس میں یو اے ای کے وزیرِ رواداری و بقائے باہمی شیخ نھیان بن مبارک آل نھیان، پاکستان کے سفیر فیصل نیاز ترمذی، قونصل جنرل حسین محمد، اماراتی معززین، سفارتکار اور پاکستانی کمیونٹی کی بڑی تعداد شریک ہوئی۔ یہ تقریب "امارات لوز پاکستان" اور پاکستان ایسوسی ایشن دبئی کے اشتراک اور دبئی پولیس کے تعاون سے منعقد ہوئی، جس میں 60 ہزار سے زائد افراد شریک ہوئے۔

شیخ نھیان بن مبارک نے یومِ آزادی کی مبارکباد پیش کرتے ہوئے پاک–امارات دوستی اور بھائی چارے کو سراہا۔ سفیر فیصل نیاز ترمذی نے دونوں ممالک کے تاریخی تعلقات، ثقافتی تبادلوں اور اقتصادی تعاون کو مزید مضبوط بنانے کے عزم کا اعادہ کیا۔

(جاری ہے)

تقریب میں پاکستان کی ثقافت، روایات، موسیقی، لوک رقص، روایتی کھانوں اور آرٹ نمائش کا اہتمام کیا گیا، جبکہ ممتاز پاکستانی شخصیات کو مختلف شعبوں میں خدمات پر اعزازی شیلڈز پیش کی گئیں، جن میں بزنس لیڈرز، تعلیمی رہنما، کھلاڑی، بینکرز اور میڈیا شخصیات شامل تھے۔

پاکستان ایسوسی ایشن دبئی کے صدر ڈاکٹر فیصل اکرام نے 4.5 کروڑ درہم کے پاکستان میڈیکل سینٹر کی توسیعی منصوبے کا اعلان کیا، جو جدید سہولیات کے ذریعے کمیونٹی ہیلتھ سروسز کو تین گنا بڑھائے گا۔ 1971 سے قائم پاک–امارات تعلقات میں تجارت، سرمایہ کاری، سیاحت، ٹیکنالوجی، تیل و گیس، ہاؤسنگ اور بینکاری سمیت کئی شعبوں میں مسلسل ترقی ہو رہی ہے، اور حالیہ حکومتی شراکت داری دونوں ممالک کے مستقبل کے تعاون کو مزید وسعت دے گی۔