محکمہ اطلاعات پنجاب کا فنکاروں کی خدمات کے اعتراف اور سماجی و معاشی سرپرستی کے لئے آرٹسٹ سپورٹ فنڈ کا اعلان

جمعہ 18 جولائی 2025 20:10

راولپنڈی (اُردو پوائنٹ اخبارتازہ ترین - اے پی پی۔ 18 جولائی2025ء) محکمہ اطلاعات و ثقافت حکومت پنجاب کی جانب سے فنکاروں کی خدمات کے اعتراف اور ان کی سماجی و معاشی سرپرستی کے لئے آرٹسٹ سپورٹ فنڈ 2025-26 کا اعلان کر دیا گیا ہے۔ اس سلسلہ میں فلم، ٹی وی، ریڈیو، تھیٹر، میوزک، ڈانس، پینٹنگ، خطاطی مجسمہ سازی، تکنیکی شعبہ جات، ایڈیٹرز، ساؤنڈ ریکارڈرز، لائٹس مین، کیمرہ مین، اسٹنٹ مین اور میک اپ آرٹسٹ کے شعبوں سے تعلق رکھنے والے صوبہ بھر کے فنکاروں سے درخواستیں مطلوب ہیں۔

یہ بات ڈائریکٹر پنجاب آرٹس کونسل راولپنڈی محمد شکور نے آرٹسٹ سپورٹ فنڈ کے حوالے سے تفصیلات دیتے ہوئے بتائی۔ انہوں نے بتایا کہ آرٹسٹ سپورٹ فنڈ کی اہلیت کے لئے تجربہ 25 سال، ذاتی امدنی ماہانہ 35 ہزار سے کم ہو، مرد فنکاروں کی عمر کم از کم 50 سال، خواتین فنکاروں کی عمر کم از کم 45 سال اور معذور فنکاروں کے لیے عمر و تجربہ کی قید نہیں ہے۔

(جاری ہے)

انہوں نے بتایا کہ آرٹسٹ سپورٹ فنڈ کی درخواستیں 11 اگست 2025 تک جمع کروائی جا سکتی ہیں۔ انہوں نے کہا کہ مالی سال 2025ـ26 میں وظیفہ/ مالی امداد حاصل کرنے کے اہل صرف وہ فنکار ہوں گے جو اخباری اشتہار کے نتیجے میں نئی درخواست دیں گے اور جو فنکار درخواست نہیں دیں گے وہ مالی سال 2025-26 میں وظیفہ/مالی امداد کے اہل تصور نہیں ہوں گے۔ انہوں نے بتایا کہ سپورٹ فنڈ فارم متعلقہ ارٹ کونسلوں سے حاصل کیے جا سکتے ہیں اس کے علاوہ یہ فارم محکمہ اطلاعات و ثقافت کی ویب سائٹ www.icd.punjab.gov.pk، پنجاب کونسل اف دی ارٹس کی ویب سائٹwww.pac.punjab.gov.pk، اور لاہور ارٹس کونسل کی ویب سائٹwww.lac.punjab.gov.pk سے بھی ڈاؤن لوڈ کئے جاسکتے ہیں۔