بھارت کیخلاف فائنل میں پریشر تھا کہ مجھے ہر حال میں یہ میچ جیتنا ہے : محمد آصف

جب بھی پاک بھارت مقابلہ ہوتا ہے تو لوگوں کی توقع کافی بڑھ جاتی ہیں، دیکھنے والوں کو شاید اندازہ نہ ہو لیکن میچ کافی مشکل ہوگیا تھا : آئی بی ایس ایف ورلڈ ماسٹرز سنوکر چیمپئن

ذیشان مہتاب ہفتہ 19 جولائی 2025 11:51

بھارت کیخلاف فائنل میں پریشر تھا کہ مجھے ہر حال میں یہ میچ جیتنا ہے ..

منامہ (اردو پوائنٹ تازہ ترین اخبار ۔ 19 جولائی 2025ء ) بحرین میں ہونے والی آئی بی ایس ایف ورلڈ ماسٹرز اسنوکر کے فائنل میں بھارت کے برجش دامانی کو شکست دینے والے محمد آصف کا کہنا ہے کہ کھیل میں ہار جیت تو ہوتی ہے لیکن ایسا میچ کوئی نہیں ہارنا چاہتا اور اس بات کا پریشر تھا کہ مجھے ہر حال میں یہ میچ جیتنا ہے۔

آئی بی ایس ایف ورلڈ ماسٹرز اسنوکر چیمپئن محمد آصف نے کہا کہ جب بھی بھارت اور پاکستان کا مقابلہ ہوتا ہے تو لوگوں کی توقع کافی بڑھ جاتی ہیں، دیکھنے والوں کو شائد اندازہ نہ ہو لیکن میچ کافی مشکل ہوگیا تھا۔

انہوں نے کہا کہ الحمد اللہ چھٹا ورلڈ ٹائٹل جیتا ہوں، اللہ کا شکر ادا کرتا ہوں کہ مجھے کامیابی ملی ہے، ایک اور ٹائٹل پاکستان کے نام کیا جس پر خوش ہوں۔

(جاری ہے)

محمد آصف نے کہا کہ آئی بی ایس ایف ورلڈ سکس ریڈ کا ٹائٹل بھی پاکستان کے نام کرنے کی کوشش کریں گے اور اُمید ہے کہ سکس ریڈ ایونٹ میں ماسٹر ایونٹ سے بھی بہتر کھیل پیش ہوگا۔

اپنی بات کو جاری رکھتے ہوئے محمد آصف نے کہا کہ انڈر 21 کے پلیئرز سے بھی امید ہے کہ وہ پاکستان کو ٹائٹل دلوائیں گے ، جب پلیئرز کو موقع ملتا ہے تو وہ پرفارم کرتا ہے۔

انہوں نے کہا کہ ہمیشہ کوشش ہوتی ہے کہ پاکستان کے لیے کھیلیں اور ملک کا نام روشن کریں۔

واضح رہے کہ ورلڈ ماسٹرز کے فائنل میں پاک بھارت مقابلہ انتہائی سنسنی خیز ثابت ہوا جس کے بعد محمد آصف نے فائنل میں بھارت کے برجش دامانی کو 3-4 سے شکست دی۔