پنجاب حکومت نے سرکلر روڈ کے تاجروں کا دیرینہ مطالبہ منظور کرلیا

ہفتہ 19 جولائی 2025 15:47

لاہور(اُردو پوائنٹ اخبارتازہ ترین - این این آئی۔ 19 جولائی2025ء)پنجاب حکومت نے سرکلر روڈ کے تاجروں کا دیرینہ مطالبہ منظور کرلیا،بھاٹی گیٹ، شاہ عالم،موچی گیٹ، دہلی گیٹ کے تاجروں کیلئے زیر زمین دکانوں اور گوداموں کی تعمیر کی جائے گی۔ وزیر ہائوسنگ پنجاب بلال یاسین سے سرکلر روڈ کی 18مارکیٹس کے صدور نے ملاقات کی ۔ اس موقع پر وائس چیئرمین ایل ڈی اے میاں مرغوب، میاں وقار اور ڈی سی لاہور سید موسی رضا بھی شریک تھے۔

بلال یاسین نے کہا کہ سرکلر باغ کے گرد زیر زمین کاروباری مراکز اور پارکنگ پوائنٹس بنائے جائیں گے،قائد مسلم لیگ (ن) نواز شریف نے 6مختلف مقامات پر تاجروں کیلئے کاروباری مراکز کو عالمی معیار کے مطابق بنانے کی ہدایت کی ہے،ابتدائی مرحلے میں ٹیکسالی، موچی اور شیرانوالہ گیٹ کے قریب کاروباری مراکز حکومت خود تیار کروائے گی، 2200سے زائد دکانیں اور گوداموں کی تعمیر پہلے مرحلے میں مکمل کی جائے گی، دوسرے مرحلے میں شاہ عالم، بھاٹی اور دہلی گیٹ کو حکومت پنجاب تیار کروائے گی، عالمی معیار کی متبادل مارکیٹس کی تیاری تک تاجران اپنا کاروبار جاری رکھیں گے، مصنوعات کے مطابق ایک ہی کیٹگری کی دکانوں کو لاہور کے بڑے شاپنگ مالز کے ماڈل پر تیار کروایا جائے گا۔

(جاری ہے)

وائس چیئرمین ایل ڈی اے میاں مرغوب احمد نے کہا کہ شہر لاہور کو ایک ماڈل کاروباری مرکز کی فراہمی کے خواب کو عملی شکل دی جائے گی، انڈر گرانڈ ٹینکس، پارکنگ، بجلی و پانی سمیت دوکانداروں کیلئے پارکنگ کو مختص کیا جائے گا۔ ڈی سی لاہور سید موسی رضانے کہا کہ کمپلیکس کی سکیورٹی کیلئے خصوصی کیمروں سمیت سکیورٹی کے انتظامات یقینی بنائے جائیں گے، کسی بھی تاجر کے کاروبار کو کسی صورت متاثر نہیں کیا جائے گا۔