منہاج ویلفیئر نے سیلاب سے متاثرہ علاقوں میں امدادی سرگرمیوں کا آغازکردیا، انجینئر ثنا ء اللہ

لاہور (اُردو پوائنٹ اخبارتازہ ترین - اے پی پی۔ 19 جولائی2025ء) منہاج ویلفیئر فائونڈیشن نے ملک کے مختلف حصوں میں حالیہ شدید بارشوں اور سیلاب سے پیدا ہونے والی ہنگامی صورتحال کے پیش نظرفوری طور پرامدادی سرگرمیوں کا آغاز کر دیا ہے ۔ ترجمان کے مطابق راولپنڈی، چکوال، جہلم و دیگر متاثرہ شہروں میں منہاج ویلفیئر فائونڈیشن کے رضا کار متحرک ہو چکے ہیں ،متاثرین کی فوری ا مداد کیلئے مختلف مراحل میں سرگرمیوں کا آغاز کر دیا گیا ہے ۔

منہاج ویلفیئر فائونڈیشن کے ڈائریکٹر آپریشنز انجینئر ثناء اللہ خان نے اجلاس میں گفتگو کرتے ہوئے کہا کہ امدادی سرگرمیوں کے پہلے فیز میں متاثرہ علاقوں میں پکا ہوا تازہ کھانا روزانہ کی بنیاد پر تقسیم کیا جا رہا ہے تا کہ وہ خاندان جو گھروں سے محروم ہو چکے ہیں یا جو خوراک تک رسائی نہیں رکھتے بھوک اور غذائی قلت کا شکار نہ ہوں۔

(جاری ہے)

انہوں نے کہاکہ کھانے کی تیاری فیلڈ کچن اور موبائل کچن یونٹس کے ذریعے کی جا رہی ہے۔

منہاج ویلفیئر فائونڈیشن کے رضا کاروں کو ہدایات جاری کی گئی ہیں کہ بچوں،خواتین اور بزرگوں کی غذائی ضروریات پر خصوصی توجہ دی جائے۔ثنا اللہ خان نے بتایا کہ ڈاکٹر محمد طاہر القادری کی ہدایات پر عمل کرتے ہوئے دوسرے فیز میں متاثرین کو خشک راشن،ترپالیں،کپڑے اور ابتدائی طبی امداد فراہم کی جائے گی،عارضی شیلٹرز کیمپوں کے قیام اور صفائی کے اقدامات کئے جائیں گے ۔

اس حوالے سے منہاج ویلفیئر فائونڈیشن کی سروے ٹیمیں متاثرین کا ڈیٹا اکٹھا کر رہی ہیں۔انہوں نے بتایا کہ منہاج ویلفیئر فائونڈیشن تیسرے فیز میں متاثرہ خاندانوں کی بحالی گھروں کی مرمت اور بچوں کی تعلیم کی بحالی کے اقدامات کرے گی ۔انہوں نے کہا کہ یہ وقت آزمائش کا ہے اور ہم متاثرہ ہم وطنوں کو تنہا نہیں چھوڑیں گے۔ ثنااللہ خان نے کہا کہ منہاج ویلفیئر فائونڈیشن کا ہنگامی رسپانس نیٹ ورک متحرک کر دیا گیا ہے اور رضاکاران ہر ممکن وسائل کے ساتھ موجود ہیں تاکہ متاثرہ خاندانوں تک فوری امداد پہنچائی جا سکے۔

انہوں نے مزید کہا کہ ہم ملک بھر میں ممکنہ سیلابی صورتحال پر گہری نظر رکھے ہوئے ہیں اور جہاں کہیں بھی ضرورت محسوس ہو گی فوری رسپانس کے تحت امداد پہنچائی جائے گی۔ انہوں نے کہاکہ منہاج ویلفیئر فائونڈیشن خدمت انسانیت کے مشن پر کاربند ہے۔اجلاس میں ڈپٹی ڈائریکٹرز اشتیاق حنیف مغل، منصور قاسم اعوان، رانا فیصل محمود، شفقت ندیم و دیگر عہدیداران بھی موجود تھے۔