وزیراعلیٰ پنجاب کی قیادت میں صحت کے شعبے میں مثالی کام ہو رہا ہے ، ادویات کا عوام کے گھروں تک پہنچنا انقلابی قدم ، محمد حنیف عباسی

ہفتہ 19 جولائی 2025 22:11

اسلام آباد/راولپنڈی (اُردو پوائنٹ اخبارتازہ ترین - اے پی پی۔ 19 جولائی2025ء) وفاقی وزیرِ ریلوے محمد حنیف عباسی نے کہا ہے کہ وزیر اعلیٰ پنجاب کی قیادت میں صحت کے شعبے میں مثالی کام ہو رہا ہے ،اب ادویات عوام کو ان کے گھروں تک پہنچ رہی ہیں جو ایک انقلابی قدم ہے۔ان خیالات کا اظہار انہوں نے ہفتہ کو راولپنڈی انسٹیٹیوٹ آف کارڈیالوجی کے دورہ کے موقع پر کیا ۔

انہوں نے راولپنڈی انسٹیٹیوٹ آف کارڈیالوجی (آر آئی سی )کے ڈاکٹرز، نرسز اور دیگر عملے کی عوامی خدمات کے جذبے کو سرا ہتے ہوئے کہا کہ یہ ادارہ واقعی ایک مثالی طبی مرکز کی حیثیت اختیار کر چکا ہے۔ محمد حنیف عباسی نے کہا کہ میں راولپنڈی، خیبرپختونخوا اور گلگت بلتستان کے اُن عوام کا شکر گزار ہوں جو یہاں سے مستفید ہو رہے ہیں۔

(جاری ہے)

وزیر ریلوے نے مزید کہا کہ گزشتہ 13 سالوں سے یہاں سے کسی قسم کی کوئی شکایت موصول نہیں ہوئی،جب بھی میں اس ادارے کا دورہ کرتا ہوں، صرف مثبت آوازیں اور تعریفیں سننے کو ملتی ہیں جو اس ادارے کی شفاف کارکردگی اور عوامی خدمت کا منہ بولتا ثبوت ہے۔

انہوں نے کہا کہ تمام خدمات اللہ کی رضا کے لیے انجام دی جا رہی ہیں اور یہی جذبہ ہمیں کامیابی کی طرف لے جاتا ہے۔ محمد حنیف عباسی نے وزیر اعلیٰ پنجاب سے اظہار تشکر کیا جنہوں نے شعبہ صحت کو اپنی اولین ترجیحات میں شامل رکھا ہے۔ انہوں نے کہا کہ وزیر اعلیٰ پنجاب کی قیادت میں صحت کے شعبے میں مثالی کام ہو رہا ہےاور اب ادویات عوام کو ان کے گھروں تک پہنچ رہی ہیں جو ایک انقلابی قدم ہے۔