سڑک درسڑک کا سلسلہ ہوگا ختم، لاہور میں ہر سڑک کی اونچائی کا ایک لیول مقرر ہوگا

15روز میں بوسیدہ حال سڑکوں کا سروے مکمل,حتمی پلان تشکیل دیا جائے گا

اتوار 20 جولائی 2025 18:55

لاہور(اُردو پوائنٹ اخبارتازہ ترین - این این آئی۔ 20 جولائی2025ء)وزیراعلیٰ پنجاب مریم نواز شریف کے وژن کے تحت لاہور شہر میں سڑکوں کی اونچائی کی بہتری اور ٹریفک کے دیرینہ مسائل کے حل کے لیے اہم اقدامات اٹھائے جا رہے ہیں۔سیکرٹری ہاؤسنگ نورالامین مینگل کی زیر صدارت ایک اعلیٰ سطحی اجلاس میں فیصلہ کیا گیا کہ لاہور کی تمام سڑکوں کی اونچائی کو ایک مخصوص لیول پر لانے کا جامع منصوبہ تیار کیا جائے گا، تاکہ سڑک پر سڑک بنانے کے رواج کا خاتمہ کیا جا سکے اور ٹریفک کے بہاؤ کو بہتر بنایا جا سکے۔

سیکرٹری ہاؤسنگ نے کہا کہ اگلے 15 روز میں ٹیپا شہر کی بوسیدہ اور ٹوٹی سڑکوں کا تفصیلی سروے مکمل کر کے رپورٹ پیش کرے گا، جس کی بنیاد پر حتمی منصوبہ تشکیل دیا جائے گا۔ انہوں نے واضح کیا کہ یہ کام اگلے ایک سال میں مکمل کیا جائے گا۔

(جاری ہے)

‘‘سڑک پر سڑک مت بنائیں، تمام سڑکوں کو موزوں اونچائی تک لائیں تاکہ ان کی عمر بھی بڑھے اور ٹریفک کے مسائل بھی کم ہوں،’’سیکرٹری ہاؤسنگ نورالامین مینگل نے کہا۔

انہوں نے بتایا کہ ابتدائی طور پر منصوبے کا آغاز شہر کی خستہ حال اور بار بار مرمت ہونے والی سڑکوں سے کیا جائے گا۔ اس مقصد کے لیے ایس او پیز تشکیل دی جا رہی ہیں، جن کے اطلاق سے سڑکیں دیرپا اور مضبوط رہیں گی۔سیکرٹری ہاؤسنگ کا کہنا تھا کہ موزوں اونچائی کی بحالی سے لین جیومیٹری میں بہتری آئے گی اور شہریوں کو ٹریفک کے دیرینہ مسائل سے نجات ملے گی۔ انہوں نے مزید کہا کہ وزیراعلیٰ پنجاب کی خصوصی ہدایت پر شہر کی خوبصورتی کو برقرار رکھنے کے لیے تمام ضروری تکنیکی اقدامات اٹھائے جا رہے ہیں۔آخر میں انہوں نے اعلان کیا کہ لاہور کی طرز پر دیگر اضلاع کے لیے بھی اسی نوعیت کی ریگولیشنز تیار کی جائیں گی، تاکہ پورے پنجاب میں یکساں طرز پر ترقیاتی کام ممکن ہو سکے۔