بلوچستان میں پسند کی شادی پر جوڑے کے قتل کا ملزم گرفتار، واقعہ کب پیش آیا؟ معلومات سامنے آگئیں

وزیراعلیٰ بلوچستان نے واقعے کا نوٹس لیتے ہوئے ملزمان کو فوری گرفتار کرنے کا حکم دیا جس پر کارروائی کی گئی

ساجد علی اتوار 20 جولائی 2025 19:50

بلوچستان میں پسند کی شادی پر جوڑے کے قتل کا ملزم گرفتار، واقعہ کب پیش ..

کوئٹہ ( اُردو پوائنٹ اخبارتازہ ترین۔ 20 جولائی 2025ء )صوبہ بلوچستان میں پسند کی شادی پر جوڑے کے قتل کے ایک ملزم کو گرفتار کرلیا گیا، واقعہ کب پیش آیا؟ اس حوالے سے بھی معلومات سامنے آگئیں۔ تفصیلات کے مطابق سوشل میڈیا پر مرد اور خاتون کے بہیمانہ قتل کی ایک دل دہلا دینے والی ویڈیو وائرل ہونے پر وزیر اعلیٰ بلوچستان سرفراز بگٹی نے واقعے کا سختی سے نوٹس لیتے ہوئے تحقیقات اور ملوث تمام ملزمان کی گرفتاری کا حکم دیا، ترجمان بلوچستان حکومت شاہد رند کا کہنا ہے کہ یہ واقعہ عید الاضحیٰ پر پیش آیا تھا، وزیر اعلیٰ نے فوری طور پر واقعے کی جامع تحقیقات کا حکم دیتے ہوئے قانون نافذ کرنے والے اداروں کو ہدایت کی کہ جائے وقوعہ کا تعین کرکے اس واقعے میں ملوث تمام افراد کو جلد از جلد گرفتار کر کے قانون کے کٹہرے میں لایا جائے، اس پر کارروائی کرتے ہوئے ایک ملزم کو گرفتار کرلیا گیا جب کہ دیگر افراد کی شناخت جاری ہے۔

(جاری ہے)

ترجمان بلوچستان حکومت نے بتایا کہ وزیر اعلیٰ میر سرفراز بگٹی نے کہا ہے ایسی سفاکانہ حرکات نہ صرف ناقابل برداشت ہیں بلکہ یہ معاشرتی اقدار اور انسانی وقار کی سنگین توہین بھی ہیں، ریاست کی عملداری کو چیلنج کرنے والوں سے سختی سے نمٹا جائے گا اور کسی کو قانون ہاتھ میں لینے کی اجازت نہیں دی جا سکتی، ویڈیو میں دکھائی گئی بربریت ہر سطح پر قابل مذمت ہے اور حکومت بلوچستان اس ظلم پر خاموش تماشائی نہیں بنے گی، واقعے میں ملوث عناصر کو انصاف کے تقاضوں کے مطابق قرار واقعی سزا دلوانے کے لیے تمام قانونی ذرائع بروئے کار لائے جائیں گے۔