Live Updates

علی امین استعفیٰ دیکر ہمارے عام کارکن سے الیکشن میں مقابلہ کریں، جے یو آئی ف کا چیلنج

دہشت گردی، مہنگائی کا دور دورہ ہے اور کرپشن کی داستانیں رقم کی گئی ہیں، بڑی بڑی بڑھکیں ماری گئیں، 13 سال مسلط رہنے کے بعد بھی کوئی اہم اقدام نہیں کیا گیا؛ رہنما جے یو آئی عطاءالرحمان کی پریس کانفرنس

ساجد علی اتوار 7 ستمبر 2025 19:35

علی امین استعفیٰ دیکر ہمارے عام کارکن سے الیکشن میں مقابلہ کریں، جے ..

اسلام آباد ( اُردو پوائنٹ اخبارتازہ ترین۔ 07 ستمبر 2025ء ) جمعیت علمائے اسلام (ف )خیبر پختونخواہ کے امیر سینیٹر عطاء الرحمان نے وزیراعلیٰ علی امین گنڈاپور کو چیلنج کرتے ہوئے کہا ہے کہ علی امین استعفیٰ دے کر ہمارے عام کارکن سے الیکشن میں مقابلہ کریں۔ پریس کانفرنس کرتے ہوئے انہوں نے بتایا کہ پارٹی کی صوبائی شوریٰ کے اجلاس میں صوبے کی صورتِ حال پر تفصیلی گفتگو ہوئی، بونیر، سوات، صوابی اور مانسہرہ میں سیلاب سے کافی اموات اور اربوں کا نقصان ہوا، حکومت نظر نہیں آ رہی، وزیرِ اعلیٰ ڈی سی آفس میں چند گھنٹے گزار کر چلے گئے۔

سینیٹر عطاء الرحمان نے کہا کہ دہشت گردی، مہنگائی کا دور دورہ ہے اور کرپشن کی داستانیں رقم کی گئی ہیں، بڑی بڑی بڑھکیں ماری گئیں لیکن 13 سال مسلط رہنے کے بعد بھی کوئی اہم اقدام نہیں کیا گیا، ایم ایم اے کے دور کے منصوبے پر اپنا نام لکھنا زیادتی ہے، علی امین گنڈاپور استعفیٰ دیں، میدان میں آئیں اور ہمارے عام کارکن سے الیکشن میں مقابلہ کریں۔

(جاری ہے)

رہنماء جے یو آئی ف کا مزید کہنا ہے کہ صوبہ پنجاب میں بھی لوگ سیلاب سے متاثر ہوئے، پنجاب حکومت نے خیبر پختون خواہ میں گندم کی ترسیل روک دی ہے، پنجاب حکومت فوری طور پر گندم ترسیل پر پابندی ختم کرے، کرپشن اور سیلفیوں سے فارغ ہو کر حکومت کو عوامی مسائل پر کام کرنا چاہیئے۔