پاکستان فٹبال فیڈریشن کی اسکولوں کو فیفا کے عالمی تعلیمی و کھیلوں کے منصوبے فٹبال فار اسکولز پروگرام میں حصہ لینے کی دعوت دیدی

پیر 21 جولائی 2025 22:15

اسلام آبا د(اُردو پوائنٹ اخبارتازہ ترین - این این آئی۔ 21 جولائی2025ء)پاکستان فٹبال فیڈریشن نے ملک بھر کے اسکولوں کو فیفا کے عالمی تعلیمی و کھیلوں کے منصوبے فٹبال فار اسکولز پروگرام میں حصہ لینے کی دعوت دیدی۔ اس پروگرام کا مقصد فٹبال کو تعلیمی نظام کا حصہ بناتے ہوئے کھیل کے ذریعے بچوں کو مہارت سکھانا ہے، یہ بین الاقوامی پروگرام 4 سے 14 سال کی عمر کے بچوں کے لیے ترتیب دیا گیا ہے تاکہ وہ فٹبال کے ذریعے سیکھنے، بڑھنے اور مثبت انداز میں کھیلنے کے مواقع حاصل کر سکیں۔

فیفا کی جانب سے اس پروگرام کے موجودہ مرحلے میں شرکت کیلئے آخری تاریخ 31 دسمبر 2025 مقرر کی گئی ہے۔ پاکستان فٹبال فیڈریشن اس بات کو یقینی بنانے کیلئے پرعزم ہے کہ ملک کے بچے اس نایاب موقع سے فائدہ اٹھا کر اپنی صلاحیتیوں کو اجاگر کرسکیں۔

(جاری ہے)

پروگرام کے تحت، فیفا اسکولوں میں فٹبال سرگرمیوں کے مؤثر انعقاد کیلئے فزیکل ایجوکیشن اساتذہ کیلئے خصوصی تربیتی کورسز کا بھی انعقاد کرے گا جو آن لائن یا باقاعدہ کلاسز کے ذرہعے ہو سکتے ہیں۔

اس تربیت کی بدولت اساتذہ بچوں کو دلچسپ، محفوظ اور بامقصد فٹبال سرگرمیاں فراہم کر سکیں گے۔پاکستان فٹبال فیڈریشن کے صدر سید محسن گیلانی نے کہا کہ فٹبال فار اسکولز صرف ایک کھیل کا پروگرام نہیں، بلکہ یہ ہمارے بچوں کے بہتر مستقبل کی تعمیر کا ذریعہ ہے، فٹبال کے ذریعے وہ نہ صرف جسمانی طور پر صحت مند بنیں گے بلکہ ٹیم ورک، نظم و ضبط اور اعتماد جیسی صلاحیتیں بھی سیکھیں گے جو زندگی بھر ان کے کام آئیں گی، میں تمام اسکولوں سے اپیل کرتا ہوں کہ وہ اس پروگرام کا حصہ بنیں تاکہ ہمارے بچے اس خوبصورت کھیل کے ذریعے سیکھیں، آگے بڑھ سکیں اور ترقی کر سکیں۔