گزشتہ مالی سال ملکی برآمدات میں ایک ارب 36کروڑ 50لاکھ ڈالر اضافہ

برآمدات کا حجم 4.45فیصد اضافے سے 32ارب ڈالر سے تجاوزکر گیا

پیر 21 جولائی 2025 21:05

اسلام آباد (اُردو پوائنٹ اخبارتازہ ترین - این این آئی۔ 21 جولائی2025ء)گزشتہ مالی سال کے دوران پاکستان کی برآمدات میں نمایاں اضافہ ریکارڈ کیا گیا، مجموعی برآمدات کا حجم 32ارب ڈالر سے تجاوز کر گیا۔مالی سال2024-25ء میں ملکی برآمدات میں ایک ارب 36کروڑ 50لاکھ ڈالر کا اضافہ ہوگیا۔مجموعی برآمدات 4.45فیصد بڑھ کر32ارب ڈالر کی حد عبور کر گئیں۔ٹیکسٹائل برآمدات میں 7.39فیصد کا اضافہ دیکھا گیا، جس کا حجم 17ارب 88کروڑ ڈالر رہا۔

ریڈی میڈ گارمنٹس، خام کپاس، دھاگہ، نیٹ ویئر، بیڈ ویئر، تولیے اور خیموں کی برآمدات کے حجم میں بھی اضافہ ہوا۔چینی کی برآمدات 7 لاکھ 65 ہزار ٹن ریکارڈ کی گئیں جن کی مالیت 41 کروڑ 10لاکھ ڈالر رہی۔ مینوفیکچرنگ آلات کی برآمدات 4.84فیصد بڑھ کر 4ارب 22کروڑ ڈالر تک جا پہنچی۔

(جاری ہے)

قالین، دستانے، فٹبال اور دیگر سپورٹس گڈز نے بھی برآمدات کو سہارا دیا۔

چمڑے کی مصنوعات میں 4.87فیصد کا اضافہ ہوا، مجموعی حجم 57کروڑ 25لاکھ ڈالر رہا۔ ادویات کی برآمدات نے 34 فیصد اضافے کیساتھ 45کروڑ 74لاکھ ڈالر کا ہندسہ عبور کیا۔ پیٹرولیم اور کوئلے کی برآمدات میں 44فیصد اضافہ ہوا، جن کا حجم 57کروڑ 33لاکھ ڈالر ریکارڈ کیا گیا جبکہ سرجیکل آلات، پلاسٹک، سیمنٹ، جیولری اور ربڑ مصنوعات بھی برآمدات کے میدان میں پیش پیش رہیں۔دوسری جانب غذائی اجناس کی برآمدات میں 3.44فیصد کمی دیکھی گئی۔حجم 7ارب 11کروڑ ڈالر پر آ کر رک گیا۔چاول، پھل، سبزیاں، مصالحے اور گوشت جیسے شعبے دبائو کا شکار رہے۔فرنیچر اور الیکٹرک پنکھوں کی برآمدات میں بھی واضح کمی ریکارڈ کی گئی۔