وزیرصحت خواجہ سلمان رفیق کی زیر صدارت سروسز انسٹی ٹیوٹ آف میڈیکل سائنسز میں اہم اجلاس

منگل 22 جولائی 2025 16:07

لاہور (اُردو پوائنٹ اخبارتازہ ترین - این این آئی۔ 22 جولائی2025ء) صوبائی وزیر صحت خواجہ سلمان رفیق کی زیر صدارت سروسز انسٹی ٹیوٹ آف میڈیکل سائنسز میں اہم اجلاس منعقدہوا۔اجلاس کے دوران ٹیچنگ ہسپتالوں میں آئی سی یوز کی صلاحیت میں اضافہ کیلئے اقدامات کا جائزہ لیا گیا۔اجلاس کے شرکاء نے اس حوالے سے اپنی قیمتی آراء اور تجاویز پیش کیں۔صوبائی وزیر صحت خواجہ سلمان رفیق نے کہاکہ وزیر اعلیٰ پنجاب مریم نواز شریف کے ویژن کے مطابق عوام تک صحت کی بہترین سہولیات کی فراہمی اولین ترجیح ہے۔

ہسپتالوں کے موجودہ نظام میں بہتری لانے کے ساتھ ساتھ حکومت نئے ہسپتال بھی بنا رہے ہیں۔ہسپتالوں میں انفیکشن کنٹرول ڈیپارٹمنٹس کو بھی فعال بنایا جا رہا ہے۔ہسپتالوں میں ہائپو تھرمیا یونٹس بھی بنائیں جائیں گے۔

(جاری ہے)

خواجہ سلمان رفیق نے کہاکہ ہسپتالوں میں محفوظ علاج ہر مریض کا بنیادی حق ہے۔ مریضوں کے علاج میں کسی قسم کی کسر اٹھا نہیں رکھی جا رہی۔اجلاس میں چیئرمین وزیر اعلیٰ پنجاب ایڈوائزری کمیٹی برائے امراض قلب ڈاکٹر فرقد عالمگیر، ایڈیشنل سیکرٹری ٹیکنیکل محکمہ سپیشلائزڈ ہیلتھ کیئر اینڈ میڈیکل ایجوکیشن ڈاکٹر محمد وسیم، پرنسپل سمز پروفیسر زوہرہ خانم، ایم ایس سروسز ہسپتال ڈاکٹر عابد محمود غوری، پروفیسر شعیب نبی، پروفیسر مظہر اور ڈاکٹر لیاقت نے شرکت کی۔