سرینگر، غیر قانونی طورپر نظربند حریت رہنماء بلال صدیقی کی بگڑتی ہوئی صحت پراظہارتشویش

کشمیریوں کے حق خودارادیت کے پرزور حامی بلال صدیقی گردوں میں انفیکشن اوردیگر بیماریوں میں مبتلا ہیں

منگل 22 جولائی 2025 16:32

سرینگر(اُردو پوائنٹ اخبارتازہ ترین - این این آئی۔ 22 جولائی2025ء)بھارتی مقبوضہ جموں و کشمیرمیں ڈاکٹروں نے غیر قانونی طور پر نظر بند کشمیری حریت رہنما بلال صدیقی کی تیزی سے گرتی ہوئی صحت پر سخت تشویش کا اظہار کیا ہے، جو گزشتہ تین سال سے سرینگر سینٹرل جیل میںنظر بند ہیں۔کشمیر میڈیا سروس کے مطابق کشمیریوں کے حق خودارادیت کے پرزور حامی بلال صدیقی گردوں میں انفیکشن اوردیگر بیماریوں میں مبتلا ہیں۔

وہ شدید درد میں مبتلا ہیں اور چلنے پھرنے سے بھی قاصر ہیں ۔ بار بار درخواستوں کے باوجود جیل حکام انہیں بروقت اور مناسب علاج معالجے کی سہولت فراہم کرنے میں ناکام رہے ہیں۔بلال صدیقی کی میڈیکل رپورٹس کا جائزہ لینے والے ایک مقامی معالج نے خبردار کیا ہے کہ علاج معالجے کی مناسب سہولت کی عدم فراہمی سے حریت رہنماء کو زندگی کو خطرہ لاحق ہو سکتا ہے ۔

(جاری ہے)

ڈاکٹر نے مزیدکہاکہ بلال صدیقی کو فوری طور پر ہسپتال منتقل کیاجاناچاہیے ۔بلال صدیقی کے دوستوں،اہلخانہ اور حامیوں نے میڈیا، قانونی فورمز اور انسانی حقوق کی بین الاقوامی تنظیموں پر زور دیا ہے کہ وہ انہیں علاج معالجے کی فوری فراہمی کیلئے دبائو بڑھائیں۔حریت رہنماء کے ایک قریبی ساتھی نے کہاہے کہ بلال صدیقی کو علاج معالجے کی مناسب سہولت کی فراہمی نہ صرف ایک قانونی معاملہ نہیں بلکہ ایک انسانی مسئلہ بھی ہے ۔بلال صدیقی نے ہمیشہ کشمیری عوام کے وقار اور اقوام متحدہ کے تسلیم شدہ کشمیریوں کے ناقابل تنسیخ حق خودارادیت کے حصول کیلئے جدوجہد کی ہے ۔