نکاسی آب کے نظام کو بہتر بنانے کیلئے ایم ڈی واسا کی زیر صدارت اجلاس

منگل 22 جولائی 2025 20:30

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) نکاسی آب کے نظام کو بہتر بنانے کے حوالے سے ایم ڈی واسا غفران احمد کی زیر صدارت ایک اہم اجلاس منعقد ہوا ۔ اجلاس میں واسا کے تمام ڈائریکٹرز اور ایکسیئنز نے آن لائن شرکت کی اور شہر بھر کی گرین بیلٹس کو نیچے کرنے کے عمل کو مربوط اور منظم انداز میں انجام دینے پر تفصیلی غور کیا گیا۔ اجلاس کے دوران اس بات پر زور دیا گیا کہ گرین بیلٹس کے اونچے ہونے کی وجہ سے بعض مقامات پر بارشوں کے دوران پانی کی نکاسی میں تاخیر ہو رہی ہے۔

ان رکاوٹوں کو دور کرنا ناگزیر ہے تاکہ شہریوں کو بروقت ریلیف فراہم کیا جا سکے۔ ایم ڈی واسا نے کہا کہ حکومت پنجاب کے ویژن کے تحت واسا لاہور اورپی ایچ اے نے شہر میں نکاسی آب کے نظام کو بہتر بنانے اور شہری سہولیات میں اضافہ کرنے کیلئے مشترکہ حکمت عملی تیار کر لی ہے۔

(جاری ہے)

انہوں نے ہدایات دیں کہ تمام ڈائریکٹرز پی ایچ اے سے فوری رابطہ کر کے اپنے اپنے علاقوں میں ان گرین بیلٹس کی نشاندہی کریں جنہیں نیچے کرنے سے بارشی پانی کا فوری نکاس ممکن بنایا جا سکتا ہے۔

گرین بیلٹس کو نیچے کرنے کے عمل میں واسا اور پی ایچ اے کی ٹیمیں قریبی مشاورت اور مکمل ہم آہنگی کے ساتھ کام کریں۔کسی بھی قسم کی سستی، غفلت یا کوتاہی کو ہرگز برداشت نہیں کیا جائے گا۔ایم ڈی واسا نے کہا کہ شہری سہولیات کی بہتری، نکاسی آب کے موثر نظام اور ماحولیاتی توازن کے قیام کیلئے واسا اور پی ایچ اے کی یہ مشترکہ کوششیں قابل ستائش ہیں۔