الیکشن کمیشن کا کنٹونمنٹ بورڈ راولپنڈی کے وارڈ نمبر 8 میں ضمنی انتخابات کے شیڈول کا اعلان

جمعرات 11 ستمبر 2025 16:35

راولپنڈی (اُردو پوائنٹ اخبارتازہ ترین - اے پی پی۔ 11 ستمبر2025ء) الیکشن کمیشن آف پاکستان نے کنٹونمنٹ بورڈ راولپنڈی کے وارڈ نمبر 8 میں ضمنی انتخابات کے شیڈول کا اعلان کر دیا ۔ یہ نشست کنٹونمنٹ بورڈ کے رکن حافظ حسین احمد کے انتقال کے باعث خالی ہوئی تھی۔ریٹرننگ آفیسر ارشد خان کے مطابق انتخابات 5 اکتوبر (اتوار) کو ہوں گے۔الیکشن شیڈول کے مطابق کاغذات نامزدگی 12 ستمبر تک وصول کیے جائیں گے جبکہ ان کی جانچ پڑتال 15 اور 16 ستمبر کو ہوگی۔

اہل امیدواروں کی فہرست بھی انہی تاریخوں میں جاری کی جائے گی۔ 17 سے 19 ستمبر تک کاغذات کے خلاف اپیلیں دائر کی جا سکیں گی جنہیں 22 ستمبر تک نمٹا دیا جائے گا۔ 24 ستمبر کو امیدواروں کی حتمی فہرست جاری کی جائے گی اور انتخابی نشان الاٹ کیے جائیں گے۔

(جاری ہے)

ریٹرننگ آفیسر ارشد خان اور اسسٹنٹ ریٹرننگ آفیسر ناصر کمال انتخابی عمل کی نگرانی کریں گے۔

وارڈ نمبر 8 میں کل 34,092 ووٹرز ہیں جن میں 17,134 مرد اور 16,958 خواتین ووٹرز شامل ہیں۔ پولنگ کے لیے 26 سٹیشن قائم کئے گئے ہیں جن میں مردوں کے 40 اور خواتین کے 37 پولنگ بوتھ ہوں گے۔ اب تک 17 امیدواروں نے کاغذات نامزدگی وصول کیے ہیں جبکہ 3 امیدوار اپنے کاغذات جمع کروا چکے ہیں۔ ریٹرننگ آفیسر کی جانب سے الیکشن کے نتائج 7 اکتوبر کو جاری کئے جائیں گے۔