بارشوں کے دوران پنجاب پولیس کے افسران اور جوان الرٹ ہو کر اپنے فرائض سرانجام دے رہے ہیں، آئی جی پنجاب

بدھ 23 جولائی 2025 22:20

لاہور (اُردو پوائنٹ اخبارتازہ ترین - اے پی پی۔ 23 جولائی2025ء) انسپکٹر جنرل پولیس پنجاب ڈاکٹر عثمان انور کی ہدایت پرلاہور سمیت صوبہ بھر میں بارشوں کے دوران پنجاب پولیس کے افسران اور جوان الرٹ ہو کر اپنے فرائض سرانجام دے رہے ہیں۔ آئی جی پنجاب نے پولیس فورس کو امدادی سرگرمیوں میں بھرپور شرکت کی ہدایت دیتے ہوئے کہا کہ پولیس افسران و اہلکار بارش سے متاثرہ علاقوں میں مزید مستعد ہو کر ڈیوٹی سرانجام دیں۔

ٹریفک وارڈنز شاہراہوں پر ٹریفک کی روانی برقرار رکھنے میں کردار ادا کریں۔سپروائزری پولیس افسران بارش زدہ علاقوں میں امدادی سرگرمیاں خود مانیٹر کریں۔انہوں نے کہا کہ پنجاب پولیس ریسکیو اینڈ ریلیف سرگرمیوں کے حوالے سے پی ڈی ایم اے ضلعی انتظامیہ اور 1122ریسکیو اداروں سے مسلسل رابطے میں ہے۔

(جاری ہے)

پنجاب پولیس کے کنٹرول رومز سے بھی بارش سے ہونے والے نقصانات کی تفصیلات حاصل کی جا رہی ہیں۔

پولیس افسران و اہلکار لاہور سمیت بارش سے متاثرہ سڑکوں سے نکاسی آب میں واسا اور دیگر اداروں کی مدد کر رہے ہیں۔بارش کی وجہ سے متاثرہ شہریوں کو ریسکیو کرنے میں متعلقہ اداروں کی بھرپور معاونت کی جا رہی ہے۔انہوں نے افسران کو ہدایت کی کہ مزید بارش کے امکانات کے پیش نظر پولیس افسران اور اہلکار انتہائی الرٹ رہیں اور کسی بھی ہنگامی صورتحال میں فوری ریسپانڈ کریں۔