سکردو میں بادل پھٹنے ایک اور واقعہ؛ درجنوں مکانات دکانیں اور دو مساجد منہدم، کئی سیاح پھنس گئے

علاقے میں مواصلاتی نظام درہم برہم ہو گیا، سیلاب رابطہ پل بھی بہا کر لے گیا جس سے زمینی رابطہ منقطع ہوگیا

ساجد علی جمعرات 24 جولائی 2025 10:50

سکردو میں بادل پھٹنے ایک اور واقعہ؛ درجنوں مکانات دکانیں اور دو مساجد ..

سکردو ( اُردو پوائنٹ اخبارتازہ ترین۔ 24 جولائی 2025ء ) ملک کے معروف سیاحتی مقام سکردو میں بادل پھٹنے ایک اور واقعہ ہوا ہے جس کے نتیجے میں درجنوں مکانات دکانیں اور دو مساجد منہدم ہوگئیں جب کہ کئی سیاح پھنس گئے۔ میڈیا رپورٹس کے مطابق مقامی ذرائع کا کہنا ہے کہ سیلابی ریلے کی زد میں آکر 49 مکانات، 20 دکانیں اور دو مساجد مکمل طور پر منہدم ہوئیں ہیں، علاقے میں مواصلاتی نظام درہم برہم ہو گیا، اس کے علاوہ سیلاب رابطہ پل بھی بہا لے گیا جس سے زمینی رابطہ منقطع ہوگیا، سب ڈویژن ڈغونی میں شدید بارشوں کے باعث ایک مکان کی چھت گرنے کا واقعہ پیش آیا جس کے باعث ایک لڑکی ملبے تلے دب کر جاں بحق ہوگئی، متاثرہ علاقوں میں امدادی کارروائیاں جاری ہیں، تاہم دشوار گزار راستوں اور منقطع رابطوں کے باعث ریسکیو کاموں میں مشکلات درپیش ہیں۔

(جاری ہے)

خیال رہے کہ یہ حادثہ ایسے وقت میں پیش آیا جب دو روز قبل ضلع دیامر میں بھی کلاؤڈ برسٹ کے بعد سیلاب اور لینڈ سلائیڈنگ نے تباہی مچادی تھی، اس واقعہ میں لودھراں سے تعلق رکھنے والے ڈاکٹر، ان کے دیور اور سسر جاں بحق ہوئے، ان کا بیٹا لاپتہ تھا جس کی لاش آج مل گئی، واقعے کے بعد امدادی ٹیموں نے فوری کارروائی کرتے ہوئے 200 سے زائد سیاحوں کو ریسکیو کرکے چلاس منتقل کردیا تھا۔

ادھر نیشنل ڈیزاسٹر مینجمنٹ اتھارٹی نے بتایا کہ ملک بھر میں حالیہ بارشوں کے دوران مختلف حادثات میں اموات کی مجموعی تعداد 252 تک پہنچ چکی ہے، گزشتہ 24 گھنٹوں کے دوران مزید 10 افراد اپنی جان کی بازی ہار گئے اور 13 افراد زخمی ہوئے، جاں بحق ہونے والوں میں 121 بچے، 85 مرد اور 46 خواتین شامل ہیں، صوبہ پنجاب میں سب سے زیادہ 139 اموات رپورٹ ہوئیں، خیبرپختونخوا میں 60، سندھ میں 24 اور بلوچستان میں 16 افراد جان سے گئے۔