پنجاب کے تعلیمی بورڈز کا میٹرک کے سالانہ امتحانات کے نتائج کا اعلان

لاہور/ملتان/گوجرانوالہ/بہاولپور (اُردو پوائنٹ اخبارتازہ ترین - این این آئی۔ 24 جولائی2025ء) پنجاب بھر کے تعلیمی بورڈز نے میٹرک کے سالانہ امتحانات 2025کے نتائج کا اعلان کر دیا۔لاہور بورڈ کی جانب سے میٹرک کے سالانہ نتائج کا اعلان کر دیا گیا ہے جس کے مطابق امتحانات میں کامیابی کا تناسب 65اعشاریہ 32فیصد رہا، امتحانات میں 2لاکھ 54ہزار 12طلبہ نے شرکت کی جس میں ایک لاکھ 65ہزار 912امیدواروں نے کامیابی حاصل کی۔

لاہور بورڈ سے حرم فاطمہ نے 1193نمبر لے کر پہلی پوزیشن حاصل کی، نورالہدی اور حاجی ابوذر تنویر 1188 نمبر لے کر دوسری جبکہ محمد علی 1187نمبر لے کر تیسری پوزیشن پر رہے۔ملتان تعلیمی بورڈ کی جانب سے بھی میٹرک نتائج کا اعلان کیا گیا ہے، مجموعی طور پر ایک لاکھ 25 ہزار 2طلبہ نے شرکت کی جس میں سے 91ہزار 289طلبہ کامیاب ہوئے۔

(جاری ہے)

اس کے علاوہ گوجرانوالہ تعلیمی بورڈ نے بھی میٹرک فرسٹ اینول امتحانات 2025کے نتائج کا اعلان کر دیا ہے۔

گوجرانوالہ تعلیمی بورڈ کے مطابق امتحانات میں مجموعی طور پر 2لاکھ 25ہزار 71امیدواروں نے شرکت کی جس میں سے ایک لاکھ 58ہزار 863امیدوار کامیاب ہوئے، کامیابی کا تناسب 70.58فیصد رہا۔گوجرنوالہ کے میٹرک امتحانات میں پہلی تین پوزیشنیں 19طلبہ وطالبات نے حاصل کر کے تاریخ کا نیا ریکارڈ قائم کیا، 19پوزیشنز میں سے 12پوزیشنز طالبات نے حاصل کر کے میدان مارلیا جبکہ 7پوزیشنز پر بوائز نے اپنا قبضہ جمایا۔

کنٹرولر امتحانات گوجرانوالہ کے مطابق 3امیدواروں شفایت رسول، علیشہ زیب اور فاطمہ شیراز نے 1200سے میں 1187نمبر لیکر مجموعی طور پر پہلی پوزیشن حاصل کی، محمد موہد، محمد عبداللہ نے 1186نمبر لیکر مجموعی طور پر دوسری پوزیشن سمیٹی جبکہ پانچ امیدواروں نے 1185نمبر لیکر مجموعی طور پر تیسری پوزیشن حاصل کی۔بہاولپور بورڈ آف انٹرمیڈیٹ اینڈ سیکنڈری ایجوکیشن نے میٹرک کے سالانہ امتحانات کے نتائج کا اعلان کردیا۔

بہاولپوربورڈ سے میٹرک امتحان میں 90493 امیدواروں میں سے 62860امیدوار کامیاب ہوئے، کامیابی کا تناسب 69.46فیصد رہا، چشتیاں کی طیبہ امین نے 1185نمبر لیکر پہلی پوزیشن حاصل کی، ہارون آباد کے عبداللہ رشید 1182نمبر لیکر دوسری پوزیشن پر رہے جبکہ چشتیاں کی علیزہ لیاقت 1181نمبر لیکر تیسری پوزیشن پر رہیں۔