پرانی سبزی منڈی خودکش حملے کے شہداء کی8ویں برسی ، لاہور پولیس کا شہداء کوخراج ِ تحسین

پولیس کے چاق و چوبند دستے نے شہداء کوسلامی پیش کی، پھولوں کی چادر چڑھائی اور فاتحہ خوانی کی ْ لاہور پولیس کی342 افسران و اہلکاروں نے فرض کی راہ میں اپنی جانیں نچھاور کی ہیں‘بلال صدیق کمیانہ

جمعرات 24 جولائی 2025 16:38

لاہور(اُردو پوائنٹ اخبارتازہ ترین - این این آئی۔ 24 جولائی2025ء) لاہور پولیس کی گارڈ نے ارفع کریم آئی ٹی ٹاور، پرانی سبزی منڈی خودکش حملے کے شہداء کی 8ویں برسی کے موقع پر سب انسپکٹر ریاض احمد، اے ایس آئی فیاض احمد، کانسٹیبل عمیر غنی،ساجد علی،معظم علی، غلام مرتضیٰ، علی رضا اور کانسٹیبل عابد علی کی قبور پر حاضری دی۔ لاہور پولیس کے چاق و چوبند دستے نے شہداء کوسلامی پیش کی، پھولوں کی چادر چڑھائی اور فاتحہ خوانی کی۔

فرض کی راہ میں جام ِ شہادت نوش کرنے والے شہدائے پولیس کی لازوال قربانیوں کو خراج تحسین پیش کیا گیا۔ اس موقع پر شہداء کے اہل خانہ بھی موجود تھے۔ 24جولائی2017ء میں بزدل دہشت گردوں نے ارفع کریم ٹاور، پرانی سبزی منڈی میں ڈیوٹی پر مامورجوانوں پر خودکش حملہ کیا۔

(جاری ہے)

خودکش حملے کے نتیجے میں لاہور پولیس کے یہ جانباز شہادت کے منصب پر فائز ہوئے۔

بلال صدیق کمیانہ نے پرانی سبزی منڈی خود کش؂ حملے کے شہداء کی 8ویں برسی کے موقع پر اپنے پیغام میں کہا کہ لاہور پولیس کی تاریخ فرض کی راہ میں جانیں قربان کرنے والے جانثاروں سے بھری پڑی ہے۔انہوں نے کہا کہ لاہور پولیس کی342 افسران و اہلکاروں نے فرض کی راہ میں اپنی جانیں نچھاور کی ہیں۔سی سی پی او لاہور نے کہاکہ پاکستان کے قیام، بقا اور سا لمیت میں شہداء اور غازیوں کا لہو شامل ہے۔

انہوں نے کہا کہ لاہور پولیس شہریوں کی جان ومال کے تحفظ میں فرنٹ لائن پر اپنے فرائض ادا کررہی ہے۔بلال صدیق کمیانہ نے کہا کہ شہدائے پولیس کے بچوں کی تعلیم،صحت،روزگار اور دیگر معاملات کی دیکھ بھال ہماری ذمہ داری ہے۔انہوں نے ایک بار پھر اس عزم کا اعادہ کیا کہ محکمہ پولیس زندگی کے ہر موڑ پرشہداء کے اہل ِ خانہ کے شانہ بشانہ موجود رہے گا۔