روسی طیارے کے حادثے میں کوئی مسافر زندہ نہیں بچا، حکام کی تصدیق

خراب موسم میں لینڈنگ کے دوران عملے کی غلطی کی وجہ سے ظیارے کو حادثہ پیش آیا

ساجد علی جمعرات 24 جولائی 2025 13:29

روسی طیارے کے حادثے میں کوئی مسافر زندہ نہیں بچا، حکام کی تصدیق

ماسکو ( اُردو پوائنٹ اخبارتازہ ترین۔ 24 جولائی 2025ء ) روس میں حادثے کا شکار ہونے والے طیارے کے تمام مسافروں کے ہلاک ہونے کی تصدیق کردی گئی۔ عالمی نیوز ایجنسی رائٹرز کے مطابق روس کا طیارہ 49 مسافروں کے ساتھ ملک کے مشرق میں لاپتہ ہوا، علاقائی گورنر نے بتایا کہ جمعرات کو روس کے مشرق بعید میں ایئر ٹریفک کنٹرولرز کا رابطہ A24 مسافر طیارے سے اچانک منقطع ہوگیا جس میں بچوں سمیت 49 افراد سوار تھے، طیارے کو خراب موسم میں لینڈنگ کے دوران عملے کی غلطی کی وجہ سے حادثہ پیش آیا۔

بتایا گیا کہ حادثے کے فوری بعد لاپتہ ہونے والے بدقسمت طیارے کی تلاش شروع کردی گئی جس کے نتیجے میں روس کے شہر ٹائنڈا سے تقریباً 15 کلومیٹر دور لاپتہ مسافر طیارے کا ملبہ مل گیا، روس کی سول ایوی ایشن اتھارٹی کے زیرانتظام ایک ایم آئی 8 ہیلی کاپٹر نے طیارے کا جلتا ہوا ملبہ دیکھا، طیارے کا ملبہ روس کے مشرقی علاقے امور سے ملا تاہم حکام نے حادثے میں تمام مسافروں کی ہلاکت کا خدشہ ظاہر کیا اور بعد ازاں روسی خبر رساں ایجنسی نے تصدیق کرتے ہوئے بتایا کہ طیارہ حادثے کے نتیجے میں کوئی بھی مسافر زندہ نہیں بچا۔

(جاری ہے)

اس حوالے سے مقامی ہنگامی صورتحال کی وزارت نے بتایا کہ سائبیریا سے تعلق رکھنے والی انگارا نامی ایئرلائن کے زیرانتظام طیارہ چین کی سرحد سے متصل امور نامی روسی علاقے کے ایک قصبے ٹائنڈا میں منزل کے قریب پہنچتے ہوئے اچانک ہی ریڈار سے غائب ہوگیا، ابتدائی اطلاعات سے پتا چلا ہے کہ جہاز میں 5 بچوں سمیت 43 مسافر اور عملے کے 6 افراد سوار تھے، حادثے کے بعد تمام ضروری فورسز اور ذرائع کو طیارے کی تلاش کے لیے تعینات کیا گیا جس کے نتیجے میں ملبہ ڈھونڈنے میں کامیابی حاصل ہوئی، اس طیارہ حادثے کے واقعے کو روس میں شہری ہوابازی کے حوالے سے ایک بڑا سانحہ قرار دیا گیا ہے۔