امریکی ٹیکنالوجی کمپنیاں بھارت میں نوکریاں دینا بند کریں، صدر ڈونلڈ ٹرمپ کا انتباہ

جمعرات 24 جولائی 2025 21:50

نئی دہلی (اُردو پوائنٹ اخبارتازہ ترین - اے پی پی۔ 24 جولائی2025ء) امریکی صدر ڈونلڈ ٹرمپ نے گوگل اور مائیکرو سافٹ جیسی بڑی ٹیک کمپنیوں کو خبردار کیاہے کہ وہ بیرون ملک خاص طور پر بھارت جیسے ممالک میں ملازمتیں دینے سے باز رہیں۔کشمیرمیڈیاسروس کے مطابق واشنگٹن میں اے آئی سمٹ سے خطاب کرتے ہوئے صدر ٹرمپ نے کہا کہ امریکی کمپنیوں کو چاہیے کہ وہ بھارتی ٹیک ورکرز کو نوکریاں دینے یاچین میں فیکٹریاں بنانے کے بجائے امریکی عوام کو ہی نوکریاں دینے پر زیادہ توجہ دیں۔

بھارتی اخبار انڈیا ٹوڈے کی رپورٹ کے مطابق امریکی صدر نے کہا کہ ہماری بڑی ٹیک کمپنیاں امریکی آزادی کے فوائد اٹھا کر چین میں فیکٹریاں بناتی رہی ہیں، بھارت میں ورکرز کو ملازمت دیتی رہی ہیں اور آئرلینڈ میں منافع چھپاتی رہی ہیں، وہیں امریکی شہریوں کو نظر انداز کرنے اور سنسر کرنے کا سلسلہ بھی جاری رکھا، اب وہ دن ختم ہوگئے ہیں۔

(جاری ہے)

ڈونلڈ ٹرمپ نے کہا کہ اے آئی کی دوڑ جیتنے کے لیے سلیکون ویلی اور اس سے باہر نئی حب الوطنی اور قومی وفاداری کی ضرورت ہوگی۔

انہوں نے کہا کہ ہم چاہتے ہیں کہ امریکی ٹیکنالوجی کمپنیاں پورے دل سے امریکا کے لیے کام کریں، ہم چاہتے ہیں کہ آپ امریکا کو پہلے رکھیں، بس ہم اتنا چاہتے ہیں۔صدرٹرمپ نے اس موقع پر مصنوعی ذہانت کے حوالے سے تین نئے صدارتی احکامات پر بھی دستخط کیے۔