اسحاق ڈارکا دورہ امریکہ دونوں ممالک کے درمیان باہمی تعلقات مضبوط کرنے میں اہم کردارادا کریگا، ابوذرشاد

ہفتہ 26 جولائی 2025 17:35

لاہور (اُردو پوائنٹ اخبارتازہ ترین - اے پی پی۔ 26 جولائی2025ء) صدر لاہور چیمبر میاں ابوذر شاد نے کہا ہے کہ نائب وزیراعظم محمد اسحاق ڈار کا کامیاب اور نتیجہ خیز دورہ امریکہ دونوں ممالک کے درمیان باہمی تعلقات کو مضبوط کرنے اور نئی بلندیوں پر لے جانے میں اہم کردار ادا کرے گا۔ایک بیان میں صدر لاہور چیمبر نے وزیراعظم محمد شہباز شریف اور نائب وزیراعظم اسحاق ڈار کی قیادت میں جاری سفارتی و معاشی اقدامات کو سراہتے ہوئے کہا کہ ان کی قیادت نے پاکستان کو ایک بار پھر معاشی استحکام کی راہ پر گامزن اور بین الاقوامی سرمایہ کاروں کا اعتماد بحال کیا ہے۔

انہوں نے کہا کہ اسحاق ڈار کا حالیہ دورہ واشنگٹن ڈی سی پاکستان کی معاشی بحالی اور عالمی شراکت داریوں کے فروغ کے لیے حکومت کی ٹھوس کوششوں کا مظہر ہے۔

(جاری ہے)

میاں ابوذر شاد نے کہا کہ نائب وزیراعظم اسحاق ڈار کی امریکی وزیر خارجہ مارکو روبیو سے اہم ملاقات میں بالخصوص تجارت، سرمایہ کاری، ٹیکنالوجی، زراعت اور معدنیات کے شعبوں سمیت دیگر امور پر تفصیلی تبادلہ خیال حوصلہ افزا ہے۔

صدر لاہور چیمبر نے واشنگٹن میں معروف تھنک ٹینک ’’اٹلانٹک کونسل‘‘ کے زیر اہتمام تقریب سے خطاب میں اسحاق ڈار کی شرکت کو بھی بہت اہم پیش رفت قرار دیا۔ انہوں نے کہا کہ لاہور چیمبر آف کامرس اینڈ انڈسٹری نائب وزیراعظم اسحاق ڈار کے اس ویژن کی مکمل حمایت کرتا ہے کہ پاکستان کو امداد کے بجائے باہمی فائدہ مند تجارت کی طرف بڑھنا چاہیے۔

ان کا اٹلانٹک کونسل میں دیا گیا پیغام ایک پر اعتماد ومستقبل پر نظر رکھنے والی معاشی پالیسی کا عکاس اورپاکستان کی کاروباری برادری کی توقعات سے ہم آہنگ ہے۔ پاکستان کی مارکیٹوں کو امریکی مصنوعات کے لیے کھولنے اور ایک جامع تجارتی معاہدے کے حصول کی حکومتی کوششیں نہایت اسٹریٹجک اور بروقت ہیں جو سرمایہ کاروں کے اعتماد میں اضافہ اور دوطرفہ تجارت میں وسعت کا باعث بنیں گی۔