اعلی معیار اور منفرد ذائقے کی وجہ سے چونسہ آم کی عالمی منڈی میں مانگ تیزی سے بڑھ رہی ہے، کوآرڈینیٹر وفاقی ٹیکس محتسب سیف الرحمان

اتوار 27 جولائی 2025 14:30

لاہور (اُردو پوائنٹ اخبارتازہ ترین - اے پی پی۔ 27 جولائی2025ء) وفاقی ٹیکس محتسب کے کوآرڈینیٹر سیف الرحمان نے کہا ہے کہ پاکستان کا چونسہ آم اپنی لاجواب مٹھاس، رسیلی ساخت، شہد جیسی مٹھاس اور مسحور کن خوشبو کے باعث دنیا بھر میں بے پناہ مقبولیت حاصل کر چکا ہے۔

(جاری ہے)

اتوار کو یہاں فوڈ ایکسپورٹرز کے ایک وفد سے گفتگو کرتے ہوئے انہوں نے کہا کہ آم پھلوں کا بادشاہ ہے تو چونسہ کو آموں کا بادشاہ کہا جاتا ہے، پنجاب خصوصا ًملتان اور جنوبی پنجاب میں پیدا ہونے والا یہ پھل مشرق وسطی، یورپ اور شمالی امریکہ سمیت بین الاقوامی منڈیوں میں انتہائی پسند کیا جاتا ہے۔

انہوں نے کہا کہ اعلی معیار اور منفرد ذائقے کی وجہ سے چونسہ آم کی عالمی منڈی میں مانگ تیزی سے بڑھ رہی ہے، برآمد کنندگان کو اس رجحان سے فائدہ اٹھانا چاہیے اور پھل کی تازگی کو برقرار رکھتے ہوئے پریمیم درجے کے آموں کی برآمد کو یقینی بنانا چاہیے۔ سیف الرحمان نے کہا کہ سوشل میڈیا اس کے بے مثال ذائقے کی تعریف کرتے ہوئے اس کی شہرت کو مزید بڑھا رہے ہیں، پاکستان کی زرعی برآمدات میں اضافہ میں چونسہ آم کا نمایاں حصہ ہے، اس کی بڑھتی ہوئی مانگ پاکستانی کسانوں اور برآمد کنندگان کے لیے ایک خوشگوار اور بہترین مستقبل کی نوید ہے۔