پی ڈی ایم اے نے مون سون فیکٹ شیٹ جاری کر دی

راولپنڈی (اُردو پوائنٹ اخبارتازہ ترین - اے پی پی۔ 27 جولائی2025ء) وزیراعلیٰ پنجاب مریم نواز شریف کی ہدایات کے پیشِ نظر پی ڈی ایم اے نے مون سون فیکٹ شیٹ جاری کر دی۔ فیکٹ شیٹ میں مون سون بارشوں کی صورتحال، پنجاب کے دریاؤں، بیراجز اور ڈیمز میں پانی کی سطح بارے اعداد و شمار شامل ہیں۔ ترجمان پی ڈی ایم اے کے مطابق گزشتہ 24 گھنٹوں میں لاہور، مری، قصوراور اوکاڑہ میں بارش و بوندا باندی ریکارڈ کی گئی۔

آئندہ 24 گھنٹوں میں پنجاب میں موسم گرم مرطوب رہنے اور کہیں کہیں ہلکی بارش کے امکانات ہیں۔ مون سون بارشوں کاپانچواں سلسلہ 28 جولائی سے شروع ہو گا۔مون سون بارشوں کے باعث پنجاب کے دریاؤں اور ندی نالوں میں طغیانی کا خدشہ ہے۔ گزشتہ 24 گھنٹوں میں بارشوں کے باعث حادثات سے کوئی جانی نقصان نہیں ہوا۔

(جاری ہے)

رواں سال مون سون بارشوں میں حادثات سے 151 شہری جاں بحق اور 538زخمی ہوئے ۔

209 گھر متاثر اور 121 مویشی ہلاک ہوئے ۔اموات آسمانی بجلی ،مخدوش عمارتوں کے گرنے ،دریاؤں میں نہاتے ہوئے ڈوبنے اور کرنٹ لگنے سے ہوئیں ۔ڈی جی پی ڈی ایم اے عرفان علی کاٹھیا کا کہنا ہے کہ وزیر اعلیٰ پنجاب کی ہدایات کے پیشِ نظر صوبے بھر کی انتظامیہ اور متعلقہ محکموں کو الرٹ جاری کر دیا گیا ہے ۔ وزیر اعلیٰ پنجاب کی ہدایات کے پیشِ نظر سوگوار خاندانوں کی مالی معاونت یقینی بنائی جا رہی ہے ۔

کسانوں کی فصلوں اور مویشیوں کے نقصانات کا بھی ازالہ کیا جائے گا ۔منگلا ڈیم میں 55 فیصد جبکہ تربیلا میں 83 فیصد پانی موجود ہے۔ انڈین ڈیمز میں پانی کی سطح تقریباً 36 تک فیصد ہے۔ دریائے سندھ میں کالا باغ اور تربیلا کے مقام پر نچلے درجے کا سیلاب ہے ۔دریائے سندھ میں تونسہ کے مقام پر درمیانے درجے کی سیلابی صورتحال ہے۔ دریائے چناب ،راوی ،جہلم اور ستلج میں پانی کا بہاؤ فی الحال نارمل سطح پر ہے۔

ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔ پی ڈی ایم اے کنٹرول روم اور ڈسٹرکٹ ایمرجنسی آپریشن سنٹرز 24/7 صورتحال کو مانیٹر کر رہے ہیں۔ انہوں نے کہا کہ حکومت پنجاب کی جانب سے دریاؤں ،نہروں اور برساتی نالوں میں نہانے پر مکمل پابندی عائد ہے۔خلاف ورزی کی صورت میں سخت ایکشن لیا جائے گا ۔شہری خراب موسم میں غیر ضروری سفر سے گریز کریں۔ بجلی کی تاروں اور کھمبوں سے دور رہیں ۔ مخدوش و بوسیدہ مکانات میں ہرگز رہائش نہ رکھیں ۔ ہنگامی صورتحال میں پی ڈی ایم اے ہیلپ لائن 1129 پر کال کریں۔