جیکب آباد کے قریب ٹرین حادثہ محض تکنیکی خراب تھی ، کسی قسم کی تخریب کاری کا کوئی ثبوت نہیں ملا‘ترجمان ریلویز

دہشت گرد گروہ محض سستی شہرت، بیرونی فنڈنگ اور خود کو متحرک ظاہر کرنے کے لیے ایسے حادثات کو اپنی کارروائی قرار دیتا ہے

پیر 28 جولائی 2025 18:33

لاہور (اُردو پوائنٹ اخبارتازہ ترین - این این آئی۔ 28 جولائی2025ء) ترجمان پاکستان ریلویز نے واضح کیا ہے کہ جیکب آباد کے قریب ٹرین حادثہ محض تکنیکی خراب تھی ، کسی قسم کی تخریب کاری کا کوئی ثبوت نہیں ملا۔ترجمان کے مطابق بلوچستان اور جیکب آباد کی سرحد کے قریب پیر کے روز جعفر ایکسپریس کی تین بوگیاں پٹری سے اتر گئیں، جس کی زور دار آواز نے علاقے میں شدید خوف و ہراس پھیلا دیا۔

عوام نے اسے شر پسندی کا واقعہ سمجھا لیکن حکام نے واضح کیا کہ یہ محض تکنیکی خرابی کا نتیجہ تھا، کسی قسم کی تخریب کاری کا کوئی ثبوت نہیں ملا۔

(جاری ہے)

اس کے باوجود، ایک غیر معروف دہشت گرد گروہ نے موقع غنیمت جان کر واقعے کو ’’مسلح حملہ‘‘قرار دیتے ہوئے ذمہ داری قبول کر لی۔ یہ دعویٰ نہ صرف بے بنیاد تھا بلکہ موقع پرستی اور غیر متعلقہ ہونے کی واضح مثال بھی ہے۔

سکیورٹی ماہرین کے مطابق یہ گروہ محض سستی شہرت، بیرونی فنڈنگ اور خود کو متحرک ظاہر کرنے کے لیے ایسے حادثات کو اپنی کارروائی قرار دیتا ہے حالانکہ ان کا زمینی حقیقت سے کوئی تعلق نہیں ہوتا۔ حکام کا کہنا ہے کہ ایسی گمراہ کن دعوں کو سنجیدگی سے لینا ضروری نہیں مگر ان کی پشت پناہی کرنے والے عناصر کی نشاندہی اور نگرانی ضروری ہے۔