حکومتی دعوے کے باوجود چینی کی فی کلو ایکس مل قیمت 165 روپے پر نہ آسکی

شوگر مافیا حکومتی رٹ کو مسلسل چیلنج کررہی ہے جس کا خمیازہ غریب عوام بھگت رہے ہیں، ہول سیل گروسرز ایسوسی ایشن

پیر 28 جولائی 2025 21:35

حکومتی دعوے کے باوجود چینی کی فی کلو ایکس مل قیمت 165 روپے پر نہ آسکی

کراچی(اُردو پوائنٹ اخبارتازہ ترین - این این آئی۔ 28 جولائی2025ء)وفاقی وزیر فوڈ سیکیورٹی کے دعوے کے باوجود چینی کی فی کلو ایکس مل قیمت 165 روپے پر نہ آسکی۔ہول سیل گروسرز ایسوسی ایشن کے چیئرمین رئوف ابراہیم کے مطابق پیر کو شوگر ملز مالکان کی جانب سے فی کلوگرام چینی کی مقررہ 165روپے کی ایکس مل قیمت کے برعکس 171روپے 50پیسے رہی ہے۔ایسوسی ایشن کے مطابق فی کلو چینی 165روپے کی ایکس ملز قیمت پر دستیابی کی صورت میں تھوک میں فی کلو چینی 168روپے جبکہ ریٹیل میں 176روپے میں فروخت ممکن ہے۔

ایسوسی ایشن کے مطابق شوگر مافیا حکومتی رٹ کو مسلسل چیلنج کررہی ہے جس کا خمیازہ غریب عوام بھگت رہے ہیں، کمشنر کراچی کی جانب سے چینی کی تھوک قیمت 170روپے جبکہ ریٹیل قیمت 173روپے جاری کیے گئے ہیں لیکن فی کلوگرام چینی کی ایکس ملز قیمت جب 171.50روپے ہو تو کمشنر کے جاری کردہ قیمتوں پر چینی کی فروخت کس طرح ممکن ہوسکتی ہے۔

(جاری ہے)

رئوف ابراہیم کے مطابق ملک میں چینی کے 18لاکھ میٹرک ٹن کے ذخائر موجود ہیں لہذا ملک میں چینی کی درآمدات کی ضرورت نہیں ہے بلکہ چینی درآمد کرکے ملک کا قیمتی زرمبادلہ کا نقصان ہوگا۔

انہوں نے حکومت سے مطالبہ کیا کہ وہ 165روپے کے مقررہ ایکس ملز قیمت پر عمل درآمد کو یقینی بنانے کے لیے شوگر مافیا کے خلاف موثر کریک ڈان کرے اور درآمدی پالیسی میں زمینی حقائق کو مدنظر رکھتے ہوئے ترامیم کرے۔