خاتون کو زندہ جلانے کا کیس،مقتولہ کے سسر کی ضمانت بعد از گرفتاری کی درخواست مسترد

اسلام آباد (اُردو پوائنٹ اخبارتازہ ترین - اے پی پی۔ 28 جولائی2025ء) ایڈیشنل ڈسٹرکٹ اینڈ سیشن جج راجہ آصف محمود کی عدالت نے تھانہ کرپا کی حدود میں خاتون کو زندہ جلانے کے مقدمہ میں خاتون کے سسر مستاسب کی ضمانت بعد از گرفتاری کی درخواست مسترد کردی۔پیر کے روز ضمانت بعداز گرفتاری درخواست پر سماعت کے دوران مرحومہ خاتون کیجانب سے منیر احمد ایڈوکیٹ، ایمن ملک ایڈوکیٹ، اور محمد سہیل ایڈوکیٹ عدالت میں پیش ہوئے،وکیل کی جانب سے مرنے سے پہلے ریکارڈ کیا گیا خاتون کا ویڈیو بیان عدالت میں پیش کیاگیا اور وکیل کے موبائل پرہی عدالت کو ویڈیو بیان سنایا گیا،خاتون ثانیہ بی بی نے مرنے سے پہلے کے ویڈیو بیان میں کہاکہ شام کو لڑائی ہوئی مجھے مارا گیا،سسر نے مجھے گندی گندی گالیاں بھی دیں،میں باہر بھاگی تاکہ کوئی بچائے، پیچھے سے شوہر بھی آگیا،باہر اور لوگوں نے بھی دیکھا شوہر گھسیٹ کر دروازے کے اندر لے گیا،شوہر نے گھسیٹ کر پکڑا اور سسر نے اوپر پیٹرول پھینکا اور آگ لگائی،کمرے کے 2 دروازے تھے آگ کے بعد سسر باہر چلا گیا،شوہر دوسرے دروازے سے نکلا ،مجھے آگ لگی تھی میں بھی پیچھے بھاگی،میں چیختی چلاتی رہی کافی دیر بعد مجھ پر پانی پھینکا،2 گھنٹے میں وہی پڑی رہی، کسی نے ہاتھ نہیں لگایا کوئی ہسپتال لیکر نہیں آیا، 2 گھنٹے بعد ہسپتال لیکر آئے راستے میں مارتے اور ڈراتے رہے کہ تم سے بچے کو لے لیں گے، راستے میں کہا تم کہنا میں سلنڈر سے جلی ہوں،میرے کانوں میں جو زیور تھا وہ بھی اتار لیا گیا،ہسپتال میں بھی لاکر مجھے پانی نہیں دیا گیا، ڈاکٹر نے کہا تو پانی دیا گیا، ہسپتال میں بھی ڈراتے رہے کہ بھائیوں کو بتایا تو تمہیں اور بچے کو نقصان پہنچائیں گے، میرا بچہ بھی انہی کے پاس ہے، میری یہ حالت سسر اور خاوند کیوجہ سے ہے،خاتون کا ویڈیو بیان چلانے کے بعد منیر احمد ایڈووکیٹ نے کہاکہ خاتون ویڈیو بیان میں خود بتا رہی ہے اسکو کس نے جلایا،ملزم کو ضمانت دی تو مرحومہ کے 11 سالہ بچے کی جان کو خطرہ ہوگا، خاتون کا 164 کا بیان اور مرنے سے پہلے ویڈیو بیان موجود ہے،دوران سماعت وکیل کی جانب سے مختلف 35 کیسز کا حوالہ بھی دیاگیا، دلائل مکمل ہونے کے بعد عدالت نے خاتون کے سسر کی ضمانت بعدازگرفتاری کی درخواست مسترد کردی۔

(جاری ہے)

خاتون جلنے کے باعث 1 ماہ اور 1 دن بعد پمز ہسپتال انتقال کر گئی تھی،خاتون کی مدعیت میں سسر اور خاوند کے خلاف تھانہ کرپا میں مقدمہ درج ہے۔