Live Updates

آئندہ 48 گھنٹوں میں شدید بارشوں کے باعث اربن فلڈنگ کا خدشہ ہے، تر جمان پی ڈی ای اے

منگل 29 جولائی 2025 19:21

لاہور (اُردو پوائنٹ اخبارتازہ ترین - اے پی پی۔ 29 جولائی2025ء) پی ڈی ایم اے نے لاہور، گوجرانوالہ اور راولپنڈی میں شدید بارشوں کے باعث اربن فلڈنگ کے خدشہ کا اظہار کیا ہے ، پنجا ب کے دریائوں اور ان سے ملحقہ ندی نالوں میں سیلاب کا الرٹ جاری کر دیا۔ منگل کو ترجمان پی ڈی ایم اے کے مطا بق 30 سے31 جولائی کے دوران دریائے چناب اور جہلم میں نچلے اور درمیانے درجے کی سیلابی صورتحال رہنے کا امکان ہے جبکہ دریائے راوی سے ملحقہ ندی نالوں میں طغیانی کا خدشہ ہے۔

دریائے ستلج میں گنڈا سنگھ کے مقام پر آئندہ 24 گھنٹوں میں پانی کے بہائو میں اضافہ متوقع ہے جبکہ آئندہ 48 گھنٹوں میں لاہور، گوجرانوالہ اور راولپنڈی میں شدید بارشوں کے باعث اربن فلڈنگ کا امکان ہے۔پی ڈی ایم اے نے کمشنر راولپنڈی، گوجرانوالہ، سرگودھا، فیصل آباد، ملتان، ڈیرہ غازی خان، بہاولپور اور ساہیوال ڈویژن کو الرٹ کردیا ہے۔

(جاری ہے)

اسی طر ح لا ہور، نارووال، راولپنڈی، گجرات، جہلم، منڈی بہاوالدین، سرگودھا، خوشاب، جھنگ، چنیوٹ، خانیوال، ملتان، کوٹ ادو، مظفرگڑھ، بہاولپور، سیالکوٹ، گوجرانوالہ، قصور، اوکاڑہ، حافظ آباد، وزیر آباد، ڈیرہ غازی خان،پاکپتن، وہاڑی، بہاولنگر، لودھراں، راجن پور اور چنیوٹ کے ڈپٹی کمشنرز کو بھی الرٹ جاری کر دیا ہے۔

ریلیف کمشنر پنجاب نبیل جاوید کی جا نب سے تما م کمشنرز، ڈپٹی کمشنرز، دیگر محکمہ جات کے حکام کو ممکنہ سیلا بی صورتحال کے با رے الرٹ جاری کر دیا گیا ہے۔ڈی جی پی ڈی ایم اے عرفان علی کاٹھیا نے متعلقہ محکموں کو الرٹ رہنے کی ہدایات جا ری کر تے ہو ئے کہا ہے کہ وزیر اعلی پنجاب کی ہدایات کے پیش نظر تمام تر انتظامات پیشگی مکمل کریں۔ایمرجنسی کنٹرول رومز میں سٹاف کو الرٹ رکھا جائے۔

ریسکیو 1122 کی ڈائزاسٹر رسپانس ٹیموں کو بھی ہائی الرٹ رکھا جائے۔عوام کو موجودہ صورتحال سے لمحہ بہ لمحہ آگاہ رکھا جائے۔دریائوں کے پاٹ میں موجود مکانوں اور مویشیوں کے انخلاء کو یقینی بنائیں۔ڈی جی پی ڈی ایم اے نے کہا کہ فلڈ ریلیف کیمپس میں خوراک، پینے کے صاف پانی و دیگر سہولیات کی فراہمی کو یقینی بنایا جائے۔عوام جاری کردہ احتیاطی تدابیر پر عمل کریں۔ہنگامی انخلاء کی صورت میں انتظامیہ سے تعاون کریں ۔ڈی جی پی ڈی ایم اے نے مزید کہا کہ حکومت پنجاب آپکے جان و مال کا پوری طرح سے خیال رکھے گی۔شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔