آزادانہ اورذمہ دارانہ صحافت کےمابین توازن قائم رکھناصحافی کی ذمہ داری ہے، پیر محمد مظہرسعید

منگل 29 جولائی 2025 23:05

مظفر\آباد (اُردو پوائنٹ اخبارتازہ ترین - اے پی پی۔ 29 جولائی2025ء) وزیر اطلاعات آزاد حکومت ریاست جموں وکشمیر پیر محمد مظہر سعید شاہ نے کہا ہے کہ صحافت مقدس امانت اور شعور کی بہت بڑی طاقت ہے، آزادانہ اور ذمہ دارانہ صحافت کے مابین توازن قائم رکھنا صحافی کی ذمہ داری ہے۔ سچ پر کوئی پابندی نہیں ہے، جس معاشرے میں سچ پر پابندی ہو وہ تباہ و برباد ہو جاتا ہے، سچ ایک موتی ہے اسکو بدتمیزی ،بد تہذیبی اور ذاتی خواہشات کے کیچڑ میں لپیٹا جائے تو بداخلاقی بن جاتا ہے اور معاشرے میں انتشار کا باعث بنتا ہے۔

سینٹرل پریس کلب مظفرآباد کے نومنتخب عہدیداران کو مبارکباد پیش کرتا ہوں۔ ان خیالات کا اظہار انہوں نے سینٹرل پریس کلب مظفرآباد کی نومنتخب انتظامیہ کی تقریب حلف برداری سے خطاب کرتے ہوئے کیا۔

(جاری ہے)

سینٹرل پریس کلب کی نومنتخب انتظامیہ سے وزیراعظم آزادکشمیر چوہدری انوارالحق نے حلف لیا۔ تقریب میں سپیکر آزاد جموں وکشمیر قانون ساز اسمبلی چوہدری لطیف اکبر، موسٹ سینئر وزیر کرنل ریٹائرڈ وقار احمد نور، وزراء حکومت اظہر صادق،چوہدری محمد رشید،سید بازل نقوی، اکمل حسین سرگالہ سمیت سیاسی و سماجی شخصیات، سیکرٹری اطلاعات سردار عدنان خورشید، ناظم تعلقات عامہ راجہ امجد حسین منہاس سمیت سینٹرل پریس کلب کے ممبران نے شرکت کی۔

وزیر اطلاعات آزاد کشمیر پیر محمد مظہر سعید شاہ نے کہا کہ پریس کلب اختلاف رائے کے احترام اور میڈیا کی نرسری ہے۔ پریس کلب کے عہدیداران نئے آنے والوں کے لیے رول ماڈل ہیں۔ انہوں نےکہا کہ پریس کلب کا کام صرف مسائل کی نشاندہی ہی نہیں کرتا بلکہ حل کی بھی رہنمائی کرتا ہے اور ریاست اور عوام کے درمیان پل کا کردار ادا کرنا ہے۔ جن مسائل کی نشاندہی کی جائے گی حکومت کی ذمہ داری ہے کہ ان مسائل کو حل کرنے کے لیے تندہی سے کام کرے، موجودہ حکومت عوامی مسائل کے حل کیلئے روبہ عمل ہے۔