بحریہ ٹائون منی لانڈرنگ کیس ، 2ریٹائرڈ فوجی افسران سمیت 10 افراد گرفتار ، تحقیقاتی ٹیم تشکیل

منگل 29 جولائی 2025 22:10

کراچی(اُردو پوائنٹ اخبارتازہ ترین - این این آئی۔ 29 جولائی2025ء)بحریہ ٹائون مبینہ منی لانڈرنگ کیس میں بحریہ ٹائون کے دس ملازمین کو گرفتار کر لیا گیا ہے۔سرکاری ذرائع نے بتایاکہ ایف آئی اے نے بحریہ ٹاون مبینہ منی لانڈرنگ کیس پر تحقیقاتی ٹیم تشکیل دے دی، ڈائریکٹر ایف آئی اے اسلام آباد زون ٹیم کی سربراہی کر رہے ہیں۔

(جاری ہے)

ذرائع نے بتایا کہ اینٹی منی لانڈرنگ ونگ کیس کی انکوائری کر رہا ہے ، گرفتار ملزمان میں کرنل ریٹائرڈ خلیل احمد اوربریگیڈئر ریٹائرڈ ظفر بھی شامل ہیں۔

ذرائع نے کہاکہ منی لانڈرنگ کیس کا حجم کھربوں روپے پر مشتمل ہے ، اینٹی منی لانڈرنگ ٹیم نے بحریہ ٹائون کے ہیڈ آفس سے تمام ریکارڈ حاصل کر لیا ہے، ملزمان کیخلاف تین مختلف مقدمات درج کرکے ایف آئی آر کو سیل کر دیا گیا ہے ، مزید بڑی گرفتاریاں متوقع ہیں۔