ضلعی انتظامیہ پشاور کی سپیڈ بریکرز کے خلاف کارروائی، چارسدہ روڈ پر مختلف علاقوں سے درجنوں سپیڈ بریکروں کو ہٹا دیا گیا

جمعرات 31 جولائی 2025 15:50

پشاور (اُردو پوائنٹ اخبارتازہ ترین - اے پی پی۔ 31 جولائی2025ء) ضلعی انتظامیہ پشاور نے ٹی ایم اے شاہ عالم کے ہمراہ کارروائی کرتے ہوئے چارسدہ روڈ پر مختلف علاقوں سے سپیڈ بریکروں کو مشینری کی مدد سے ہٹا دیا۔ تفصیلات کے مطابق صوبائی حکومت کے احکامات کی روشنی میں ضلعی انتظامیہ پشاور نے ٹی ایم اے شاہ عالم کے ہمراہ چارسدہ روڈ پر مختلف علاقوں میں کارروائی کرتے ہوئے درجنوں سپیڈ بریکرز کو بھاری مشینری سے ہٹا دیا۔

(جاری ہے)

عوام کی جانب سے شکایات موصول ہو رہی تھیں کہ ان سپیڈ بریکرز کی وجہ سے اکثر گاڑیوں کے ٹائر پھٹ جاتے ہیں اور اکثر مقامات پر ایکسیڈنٹ بھی ہوئے ہیں۔ موقع پر موجود عوام نے انتظامیہ کے اس اقدام کو کافی سراہا اور داد دی۔ ڈپٹی کمشنر پشاور کے مطابق پشاور میں غیر قانونی سپیڈ بریکرز کے خلاف ضلعی انتظامیہ کا کریک ڈاؤن جاری ہے۔ انھوں نے انتظامی افسران کو اپنے علاقوں میں سپیڈ بریکرز کے خلاف کارروائی کی ہدایت کی ہے اور دوبارہ سپیڈ بریکرز بنانے والوں کو جیل بھجوانے کے احکامات جاری کیے ہیں۔