خاتون کو ہراساں کرنے پر کے الیکٹرک کے سی ای او کو عہدے سے ہٹانے کا حکم، 25 لاکھ جرمانہ

جرمانہ ادا نہ کرنے کی صورت میں جائیداد ضبط، شناختی کارڈ اور پاسپورٹ بلاک کردیا جائے، صوبائی محتسب اعلی پیشہ ورانہ تعلقات میں ہمیشہ دیانت داری اور وقار کی اقدار کو برقرار رکھا ہے، حالیہ فیصلہ انتہائی تکلیف دہ ہے،مونس علوی

جمعرات 31 جولائی 2025 16:05

کراچی (اُردو پوائنٹ اخبارتازہ ترین - این این آئی۔ 31 جولائی2025ء)کے الیکٹرک کے سی ای او مونس علوی کو سزا سنا دی گئی، جس کے مطابق انہیں عہدے سے ہٹانے کا حکم دیا گیا ہے اور ساتھ ہی 25 لاکھ روپے کا جرمانہ بھی عائد کیا گیا ہے۔تفصیلات کے مطابق صوبائی محتسب اعلی نے سی ای او کے الیکٹرک مونس علوی کو سزا سنادی۔ صوبائی محتسب اعلی نے سی ای او کے الیکٹرک کو عہدے سے ہٹانے کا حکم دیدیا اور ان پر 25 لاکھ روپے جرمانہ بھی عائد کردیا۔

صوبائی محتسب اعلی سندھ کے مطابق سی ای او کے الیکٹرک پر الزام ثابت ہوتا ہے۔واضح رہے کہ سی ای او کے الیکٹرک کے خلاف مہرین زہرہ نے شکایت درج کروائی تھی۔صوبائی محتسب اعلی کے مطابق سی ای او کے الیکٹرک ایک ماہ جرمانے کی رقم ادا کریں۔ انہوں نے شکایت کنندہ مہرین زہرہ کو ہراساں کیا اور ذہنی اذیت دی۔

(جاری ہے)

مونس علوی اگر جرمانے کی رقم ادا نہ کریں تو منقولہ اور غیر منقولہ جائیداد ضبط کی جائے۔

جرمانہ ادا نہ کریں تو شناختی کارڈ اور پاسپورٹ بھی بلاک کیا جائے۔یاد رہے کہ مونس علوی کے خلاف سابق چیف مارکیٹنگ افسر مہرین زہرہ نے شکایت درج کروائی تھی۔ درخواست گزار کے مطابق شکایت کنندہ کو 2019 میں کے الیکٹرک نے کنسلٹنسی کے لیے رکھا تھا۔مہرین زہرہ کی درخواست پر سماعت جسٹس ریٹائرڈ شاہ نواز طارق نے کی۔بعد ازاں کے الیکٹرک کے سی ای او مونس علوی نے ایکس (سابقہ ٹوئٹر)پر اپنے بیان میں کہا کہ پیشہ ورانہ تعلقات میں ہمیشہ دیانت داری اور وقار کی اقدار کو برقرار رکھا ہے، حالیہ فیصلہ انتہائی تکلیف دہ ہے۔

انہوں نے کہا کہ قانونی عمل اور اس کو برقرار رکھنے والے اداروں کا احترام کرتا ہوں۔ نتائج میری تجربہ کردہ صورتحال کی حقیقت کی عکاسی نہیں کرتے۔ قانونی مشیر کیساتھ فیصلے کا جائزہ لے رہا ہوں اور اپیل کروں گا۔ لوگوں کی حمایت کے لیے شکر گزار ہوں جو مجھے جانتے ہیں۔