والی بال انڈر 19ورلڈ چیمپئن شپ کے پری کوارٹر فائنل میں ریفری کے متنازع فیصلے پر پاکستان کا احتجاج

پری کوارٹر فائنل میں پاکستان اور پولینڈ کے درمیان مقابلہ سنسنی خیز رہا جس میں پولینڈ 3۔2 سے فاتح رہا

جمعرات 31 جولائی 2025 17:00

اسلام آبا د(اُردو پوائنٹ اخبارتازہ ترین - این این آئی۔ 31 جولائی2025ء)انڈر 19 والی بال ورلڈ چیمپئن شپ کے پری کوارٹر فائنل میں ریفری کے متنازع فیصلے کے باعث پولینڈ نے پاکستان کو شکست دے دی۔ازبکستان میں جاری ورلڈ انڈر 19 والی بال چیمپئن شپ کے پری کوارٹر فائنل میں پاکستان اور پولینڈ کے درمیان مقابلہ سنسنی خیز رہا جس میں پولینڈ 3۔2 سے فاتح رہا۔

میچ کے دوران اور خاص طور پر آخری لمحات میں ریفری کے فیصلے متنازعہ رہے جس پر میچ کے بعد پاکستانی کھلاڑیوں کی ریفری کے ساتھ تلخ کلامی بھی ہوئی۔

(جاری ہے)

اس حوالے سے پاکستان والی بال فیڈریشن کے چیئرمین چوہدری یعقوب نے کہا کہ ریفری کے متنازع فیصلوں کے معاملے پر عالمی والی بال تنظیم ایف آئی وی بی کو خط لکھ کر احتجاج کریں گے۔چوہدری یعقوب نے انکشاف کیا کہ آخری پوائنٹ کے بعد پاکستان ٹیم کے مینجر نے کنٹرول کمیٹی سے کہا تھا کہ اس فیصلے کی فوٹیج کو دیکھا جائے جس کے بعد کنٹرول کمیٹی کے نمائندے نے اعتراف کیا کہ پولینڈ کا فاول ہوا تھا اور غلطی پر معذرت کی تاہم ٹورنامنٹ میں ریفری کے فیصلے پر ری ویو دستیاب نہ ہونے کی وجہ سے فیصلہ تبدیل نہیں کیا جا سکتا۔

ریفری کے متنازع فیصلوں پر سوشل میڈیا پر بھی والی بال کے مداحوں کی جانب سے شدید تنقید کی گئی ۔